Idman.biz
"Zədə səbəbdən Qızıl Avropa Liqasında milli ilə çıxış edə bilmədim".
Bunu İdman.biz-ə Azərbaycan millisinin voleybolçusu Ayşən Abduləzimova deyib.
Macarıstanın "Vaşaş" klubu ilə yollarını ayıran 32 yaşlı blokçu gələcək planlarını açıqlayıb. O bildirib ki, hazırda müalicəsini davam etdirir: "Zədələrimin üstündə işləyirəm. Əgər vaxtım olarsa, mövsüm əvvəli bir qədər dincələcəm. Ancaq yeni voleybol ilinə harada başlayacağımı bilmirəm. Hazırda təklifləri götür-qoy edirəm. Yerli klublardan təkliflər var. Ona görə də hələ ki fikirləşirəm. Azərbaycanda qala da bilərəm, gedə də bilərəm. Hər şey ola bilər".
Uzun illər legioner həyatı yaşayan Abduləzimova idmançı karyerasında xarici təcrübənin önəmini vurğulayıb: "Qazandığım ən dəyərli təcrübə Çempionlar Liqasında çıxış etmək olub. Əvvəllər də bunu demişəm ki, əgər imkanım olsaydı, ölkədən daha tez çıxar, legioner həyatını yaşamağa daha erkən başlayardım. Əlbəttə ki, bunun üstünlükləri kimi, çətinlikləri də var. Ancaq hər gənc oyunçuya legioner həyatı yaşamağı məsləhət görürəm".
Qeyd edək ki, Abduləzimova sonuncu klubu "Vaşaş"la 5 dəfə Macarıstan çempionu olub.
Aytac Sahəd
İdman.biz
