Idman.biz
Türkiyəli tennisçi Zeynəb Sönməz mövsümün ilk "Böyük dəbilqə" turnirində tarixi uğura imza atıb.
İdman.Biz xəbər verir ki, Zeynəb Sönməz Avstraliya Açıq turnirində tək qadınlar yarışında matç qazanan ilk türk qadın tennisçi olub. O, ilk turda rusiyalı Yekaterina Aleksandrovanı 2:1 hesabı ilə məğlub edərək adını ikinci tura yazdırıb.
Türk tennisçi ikinci turda Macarıstan təmsilçisi Anna Bondar ilə ABŞ-dan Elizabet Mandlik arasındakı cütün qalibi ilə qarşılaşacaq.
Zeynəb Sönməz bu matçda yalnız idman nəticəsi ilə deyil, davranışı ilə də diqqət çəkib. Qarşılaşma zamanı yüksək temperatur səbəbindən top toplayıcı uşaqlardan biri özünü pis hiss edib. Vəziyyəti görən Zeynəb dərhal uşağın yanına gedərək ona kömək edib və meydança kənarına qədər müşayiət edib. Oyuna qısa fasilə verilib, tribunalardan isə tennisçinin bu hərəkəti alqışlarla qarşılanıb.
Zeynəb Sönməzin bu davranışı dünya mediasında da geniş işıqlandırılıb və onun idmanda fair-play nümunəsi göstərdiyi vurğulanıb.
