Idman.biz
Dördqat "Böyük Dəbilqə" çempionu və dünyanın 2-ci raketkası, italyan tennisçi Yannik Sinner bildirib ki, bu mövsüm ili dünyada birinci yerdə başa vura bilməyəcək.
İdman.Biz xəbər verir ki, Sinner bu günlərdə Avstriyanın paytaxtı Vyanada keçirilən ATP-500 kateqoriyalı turnirin qalibi olub.
Final matçında Sinner alman tennisçi Aleksandr Zverevə (ATP reytinqində 3-cü yer) qarşı 3:6, 6:3, 7:5 hesabı ilə qalib gəlib.
"Bir nömrəli olmaq artıq mənim üçün mümkün deyil. Hazırda bu barədə düşünmürəm. Gələn ilin məqsədi bu olacaq. Bu mövsüm hər şey mənim əlimdə deyil. İlin necə keçdiyini nəzərə alsaq, böyük uğurlar qazandıq. İndi sadəcə ili mümkün qədər yaxşı başa vurmaq istəyirəm. Dekabr mənim üçün çox vacib bir ay olacaq. İnanıram ki, bu ayda böyük dəyişikliklər edə və çox iş görə bilərəm. Növbəti mövsümə hazırlaşmaq çox vacib olacaq. Bu il əldə etdiklərimdən artıq məmnunam. Görək bu ili necə başa vuracağam", - Punto de Break Sinnerin sözlərini sitat gətirib.
Xatırladaq ki, Zverev üzərində qələbə Sinnerin ATP turnirlərində 22-ci karyera titulu, həmçinin 2025-ci ildəki 4-cü turnir qələbəsidir. Həmçinin o, bu uğurla 500 reytinq xalını qazanaraq dünya reytinqində ikinci pillədəki mövqeyini möhkəmlədib.
