Idman.biz
6-22 noyabr tarixlərində Səudiyyə Ərəbistanında keçiriləcək İslam Oyunlarının startına sayılı günlər qalır.
Azərbaycan bu yarışda bir çox idman növlərində təmsil olunacaq və onlardan biri də stolüstü tennisdir.
Bəs hazırlıq prosesinin sürətlə davam etdiyi bu növdə komandamızın uğur şansları necədir?
Bu barədə qadınlardan ibarət milli komandanın baş məşqçisi Fərhad İsmayılov İdman.Biz-ə danışıb.
"Komandanın heyəti demək olar ki, MDB Oyunlarındakı kimi olacaq, ona görə də bu dəfə medal vəd etmirəm. Çünki bu turnirdə digər ölkələr əsas yığma heyətlə çıxış edəcəklər. Bizdə isə Mərziyə Nurmətova və Aylin Əsgərovaya 21 yaşlı Zemfira Mikayılova qoşulacaq. O, onlardan cəmi bir qədər böyükdür. Qızlara çox çətin olacaq, çünki İslam Oyunlarında Misir, Türkiyə, Qazaxıstan, Özbəkistan və İndoneziyadan çox güclü idmançılar iştirak edəcəklər. Amma beynəlxalq təcrübə baxımından bu turnir onlar üçün çox faydalı olacaq. Əlbəttə, ümid edirəm ki, aralarından kimsə öz imkanlarından daha yaxşı çıxış göstərə biləcək", – deyə baş məşqçi vurğulayıb.
Vüqar Vüqarlı
