Idman.biz
Serbiyalı tennisçi Novak Cokoviçin "Australian Open – 2012" turnirinin qalibi olduğu final görüşündə istifadə etdiyi raketka hərracda rekord qiymətə satılıb.
İdman.Biz xəbər verir ki, ESPN telekanalının məlumatına görə, sözügedən raketka 540 min dollara (təxminən 918 min AZN) alıcı tapıb. Bu, tennis raketkaları arasında indiyədək qeydə alınmış ən yüksək məbləğ hesab olunur.
Qeyd edək ki, "Australian Open – 2012"nin final görüşü "Böyük Dəbilqə" turnirlərinin tarixində ən uzunmüddətli həlledici oyun kimi yadda qalıb. Həmin qarşılaşmada Cokoviç ispaniyalı Rafael Nadal üzərində qələbə qazanıb. Final matçı 5 saat 53 dəqiqə davam edib.
Buna qədər rekord satış 2025-ci ildə qeydə alınmışdı. Həmin vaxt ispaniyalı Karlos Alkarasın "Uimbldon – 2023" finalında Cokoviçə qalib gəldiyi oyunda istifadə etdiyi raketka 173 min dollara (təxminən 294 min AZN) satılmışdı.
