Idman.biz
III MDB Oyunları çərçivəsində keçirilən stolüstü tennisçilər arasında komanda yarışlarında Azərbaycanın oğlanlardan və qızlardan ibarət milliləri gümüş medal qazanıblar.
Azərbaycanın qadınlardan ibarət stolüstü tennis yığmasının baş məşqçisi Fərhad İsmayılov sözügedən qarşılaşmadan sonra İdman.biz-ə danışıb.
– Fərhad müəllim, qızlarımızın qalib gəlməsi üçün nə çatmadı?
– Qızlardan çox razıyam. Finala çıxmaqla onlar ən yaxşı oyunlarını göstərdilər və yarımfinalda çox güclü Belarus komandası üzərində qələbə qazandılar. Rusiyanın komandası, onlara tətbiq olunan sanksiyalardan əvvəl Avropanın ən güclü və dünyanın ən yaxşı komandalarından biri sayılırdı. Buna görə də belə rəqibə uduzmaq utanc verici deyil. Qızlar əllərindən gələni etdilər.
– Bu halda bunu "qızıldan da qiymətli gümüş" adlandırmaq olar?
– Əlbəttə, bu ifadəni işlətmək lazımdır. Çünki rusiyalı stolüstü tennisçilər beynəlxalq yarışlarda iştirak etməsələr də, həm potensialını, həm də gücünü qoruyub saxladılar. Bu turnir onlar üçün özlərini göstərmək imkanı oldu və bunu gözəl şəkildə dəyərləndirdilər. Yarışlar hələ bitməyib və ümid edirəm ki, qızlarımız Azərbaycan azarkeşlərini daha çox sevindirəcəklər.
Vüqar Vüqarlı
