Idman.biz
Monteneqronun Budva şəhərində keçirilən şahmat üzrə klublararası Avropa Kubokunda Azərbaycan təmsilçiləri növbəti qələbələrini qazanıblar.
İdman.Biz xəbər verir ki, yarışın üçüncü turunda kişilər arasında mübarizə aparan "Vüqar Həşimov" Monteneqronun "Buduçnost" klubunu 5:1 hesabı ilə məğlub edib. Qadınların turnirində isə "Odlar Yurdu" Bosniya və Herseqovinanın "Zenitsa" komandasına 3:1 hesabı ilə qalib gəlib.
Üç turdan sonra "Vüqar Həşimov" altı xalla ikinci, "Odlar Yurdu" isə dörd xalla beşinci pillədə qərarlaşıb. Azərbaycanlı qrossmeyster Şəhriyar Məmmədyarovun çıxış etdiyi Türkiyənin "Beyegan Pendik" klubu altı xalla liderdir.
"Vüqar Həşimov"un heyətində Rauf Məmmədov, Aydın Süleymanlı, Şiroğlan Talıbov, Read Səmədov, Xəzər Babazadə, Vüqar Manafov və Kənan Qarayev yer alıblar.
"Odlar Yurdu"nu isə Ülviyyə Fətəliyeva, Gövhər Beydullayeva, Günay Məmmədzadə, Xanım Balacayeva və Gülnar Məmmədova təmsil edirlər.
İlkin reytinq sıralamasında "Odlar Yurdu" 22 komanda arasında beşinci, "Vüqar Həşimov" isə 108 iştirakçı arasında səkkizinci yerdədir.
Qeyd edək ki, İsveçrə sistemi üzrə yeddi turdan ibarət Avropa Kuboku oktyabrın 23-də başa çatacaq.
