Ryder Cup turnirində Rori Makilroya və Avropa komandası üzvlərinə ünvanlanan təhqirlər "qırmızı xətti keçib". Bunu ABŞ PGA təşkilatının icraçı direktoru Derek Spreq açıqlayıb.
Avropa yığması Bethpage-də ABŞ-ın son anda başladığı güclü qayıdışını dəf edərək 15:13 hesablı qələbə qazandı. Ancaq turnirin ikinci günündə Avropa yeddi xallıq üstünlük əldə edərkən, Makilroya qarşı təzyiqlər daha da artdı. Hətta irland ulduzun həyat yoldaşı Erika Makilroy 17-ci çuxurda amerikalı azarkeşin atdığı içki şüşəsinin hədəfinə çevrildi.
"Keçən həftə baş verənlər bizi məyus etdi. Golfda, xüsusən Ryder Cup kimi nüfuzlu yarışda bu cür davranışa yer yoxdur. Biz də baş verənlərdən razı deyilik", – deyə Spreq Golf Channel-ə bildirib.
Rori Makilroy isə təhqirləri "qəbuledilməz" adlandıraraq qeyd edib ki, belə hallar tamamilə yolverilməzdir. O, bəzi tamaşaçılara cavab verməyə məcbur qaldığını etiraf etsə də, "ümumilikdə biz vəziyyəti ləyaqətlə qarşıladıq və performansımızla onları susdurduq" sözləri ilə yekunlaşdırıb.
Spreq yaxın günlərdə Makilroya və ailəsinə rəsmi üzr məktubu göndərməyə hazırlaşdığını açıqlayıb. Avropa kapitanı Lyuk Donald isə BBC Sport-a bildirib ki, bir çox amerikalı azarkeş ona "öz fanatlarının davranışından utandıqlarını" söyləyib və bu məsələnin gələcəkdə ciddi müzakirə olunmalı olduğunu vurğulayıb.
Müəllif: Sean Kearns
Mənbə: BBC Sport
Dərc olunub: 2 oktyabr 2025
