Avropanın qolf komandası Ryder Cup 2025-də tarixi zəfərə imza atdıqdan sonra bütün diqqətlər kapitan Luk Donaldın üzərinə yönəldi. Onun rəhbərliyi ilə Avropa yalnız beşinci dəfə ABŞ torpaqlarında titul qazandı və indi hamını düşündürən sual budur: Donald 2027-ci ildə İrlandiyada keçiriləcək növbəti turnirdə komandaya yenidən başçılıq edəcəkmi?
Bethpage Black meydanında azarkeşlərin "İki il də qal!" şüarları altında Avropa oyunçuları qələbəni qeyd edirdilər. Donald isə tarixə düşərək, Toni Ceklindən (1985 və 1987) sonra ardıcıl iki Ryder Cup qazanan ikinci Avropa kapitanı oldu.
Turnirdə gərgin ab-hava, hətta Rori Makkilroyun sözləri ilə desək, "təzyiq və təhqiramiz davranışlar" müşahidə olunurdu. Lakin məhz Donaldın komandaya aşıladığı dözümlülük və düzgün hazırlıq bu uğurun əsas açarı sayılır.
"Bu işə ürəkdən yanaşdım, çünki həm oyunçulara, həm də mənim üçün çox dəyərli olan Ryder Cup-a borclu olduğumu hiss edirdim. Öz oyunumu ikinci plana atmalı oldum. Hər gün düşünürdüm ki, nə edə bilərəm ki, komandaya bir addım da üstünlük qazandırım," — deyə Donald bildirib.
Onun sözlərinə görə, Nyu-Yorkdakı mühit çətin və bəzən dözülməz idi: "Amma oyunçuları kifayət qədər hazırlayanda, onlarla davamlı ünsiyyətdə olanda və aydın plan verdikdə, əlavə motivasiyaya belə ehtiyac qalmır. Çünki birlik hissi hər şeydən güclüdür."
İndi isə bütün Avropa idman ictimaiyyəti gözləyir: Luk Donald 2027-ci ildə də kapitanlıq missiyasını davam etdirəcəkmi?
