Cənubi Koreya Prezidenti Yun Sok Yol səkkiz illik fasilədən sonra ilk dəfə qolf meydançasına çıxıb. O, noyabrın 9-da baş tutan məşqi ilə ABŞ-ın seçilmiş prezidenti Donald Tramp-la qarşıdakı görüşə hazırlaşır. Bu barədə məlumatı Prezident Administrasiyası yayıb, xəbəri isə The Guardian dərc edib.
Yun-un sonuncu dəfə qolf oynaması 2016-cı ilə təsadüf edirdi. Mütəxəssislərin fikrincə, dövlət başçısının qolf məşqlərinə qayıtması, Tramp-la şəxsi münasibətlər qurmaq və bunun üzərindən Cənubi Koreyanın maraqlarını irəli aparmaq istəyi ilə bağlı ola bilər.
"Trampın ətrafındakı bir çox insan mənə deyib ki, bizim aramızda yaxşı münasibət formalaşa bilər," — Yun, Trampı telefonla qələbə münasibətilə təbrik etdikdən sonra keçirdiyi mətbuat konfransında bildirib.
Xatırladaq ki, Trampın əvvəlki prezidentlik dövründə də qolf ikitərəfli münasibətlərin bir hissəsi olmuşdu. Məsələn, 2017-ci ildə Cənubi Koreyaya səfəri zamanı Tramp yerli qolfçuları "dünyanın ən yaxşıları arasında" adlandırmış və ölkədə bu idmanın populyarlığını yüksək qiymətləndirmişdi.
6 noyabr seçkilərinin nəticələri elan edildikdən sonra isə Tramp Floridada tərəfdarları qarşısında çıxış edərək vəd edib ki, onun prezidentliyi dövründə "müharibələr olmayacaq".
