Zirədə 5 qol

"Zirə" - "Qarabağ" - 3:2

Salifu Suma, 56, 67. Davit Volkov, 90 - Aleksey Kaşuk, 20. Patrik Andrade, 42

"Qarabağ" növbəti oyununu keçirib. Komandamız Misli Premyer Liqasının XXI tur matçında "Zirə"nin qonağı olub. Qarşılaşma Zirə İdman Kompleksinin stadionunda baş tutub.

Qurban Qurbanov bu görüşdə aşağıdakı start heyətinə şans verib: 1. Şahrudin Məhəmmədəliyev, 55. Bədavi Hüseynov (k), 24. Aleksey İsayev, 27. Toral Bayramov, 22. Musa Qurbanlı, 29. Marko Veşoviç, 81. Kevin Medina, 66. Patrik Andrade, 19. Redon Cica, 21. Aleksey Kaşuk, 11. Emmanuel Addai.

İlk dəqiqələrdən top uğrunda gərgin mübarizə gedib. Hər iki komanda meydançanın mərkəzini ələ keçirməyə çalışırdı. Futbolçularımız getdikcə təşəbbüsü ələ almağı bacarıblar. Mübarizə yüksək səviyyədə olsa da, hər iki tərəf müdafiə xəttində etibarlı oynadığından, az sayda qol vəziyyəti yaranırdı. Belə vəziyyətlərin birində Şahrudin Məhəmmədəliyev əla qurtarışla yadda qalıb.

Məhdud sayda təhlükəli hücumlar olsa da, komandamız fasiləyə qədər 2 qol vurmağa müvəffəq olub. 20-ci dəqiqədə Toral Bayramovun sol cinahdan ötürməsini Aleksey Kaşuk dəqiq zərbə ilə tamamlayıb. 42-ci dəqiqədə isə Patrik Andrade uzaq məsafədən mükəmməl qola imza atıb. Lakin ikinci hissədə rəqib 3 qol vuraraq, 3:2 hesablı qələbə qazanıb.

Aktivində 50 xal olan komandamız turnir cədvəlinə başçılıq edir.

Qeyd edək ki, "Qarabağ" növbəti oyununu fevralın 11-də evdə "Səbail"ə qarşı keçirəcək.