Zaqrebdə üç qol

"Dinamo" (Zaqreb, Xorvatiya) – "Qarabağ" - 3:0
Marko Pyatsa, 29. Sandro Kulenoviç, 75; 80

Komandamız növbəti avrokubok oyununu keçirib. Çempionlar Liqasında mübarizə aparan Qurban Qurbanovun yetirmələri pley-off mərhələsinin ilk matçına çıxıb. "Qarabağ" Zaqrebdə Xorvatiya "Dinamo"su ilə görüşüb.

Komandamız görüşü aşağıdakı start "11-liy"i ilə başlayıb: Fabian Buntiç, Mateus Silva, Julio Romao, Yassin Benzia, Abdullah Zubir, Bəhlul Mustafazadə, Leandro Andrade, Olavio Juninyo, Elvin Cəfərquliyev, Patrik Andrade, Kevin Medina.

Matçın ilk 45 dəqiqəsi qarşılıqlı hücumlarla keçib. Hər iki komanda qol epizodları yaratsa da, bunlardan yalnız biri qolla nəticələnib. Marko Pyatsa meydan sahiblərini sevindirib.

Komandamız hesaba tarazlıq gətirmək üçün çoxsaylı qol imkanları əldə edib. Olavio Juninyo və Patrik Andradenin hərəsi iki dəfə fərqlənməyə yaxın olub.

Fasilədən sonra təzyiqi artıran komandamız üstünlüyü ələ alıb. Ardıcıl hücumlar quran futbolçularımız dəfələrlə qola yaxın olub. Olavio Juninyo, Yassin Benzia və Abdullah Zubirin zərbələri yaddaqalan alınıb.

Sürətli əks-hücumlar quran Xorvatiya klubu isə əlinə düşən imkanlardan daha yaxşı istifadə edib. "Dinamo"nun cari mövsümdəki bombardiri Sandro Kulenoviç oyuna sonradan daxil olaraq 2 dəfə fərqlənib. Komandamız bu fərqi azaltmaq üçün irəli atılsa da, imkanlardan yararlanmayıb. Meydan sahibləri isə daha bir neçə təhlükəli əks-hücum qurub. Beləliklə, komandamızın Zaqreb səfəri meydan sahiblərinin 3:0 hesablı qələbəsi ilə başa çatıb.

Qeyd edək ki, pley-off mərhələsinin cavab oyunları çərçivəsində baş tutacaq "Qarabağ" – "Dinamo" görüşü avqustun 28-də Bakıda keçiriləcək.