Qarabağ FK
"Araz-Naxçıvan" – "Qarabağ" – 1:0
Qol: Felipe Santos, 28 (pen.)
"Qarabağ" növbəti oyununu keçirib. Komandamız Azərbaycan kubokunun yarımfinal mərhələsinin ilk matçına çıxıb.
Qurban Qurbanovun yetirmələri "Araz-Naxçıvan"ın qonağı olublar. "Liv Bona Dea Arena"dakı qarşılaşmaya komandamız bu heyətlə çıxıb: 97. Fabian Buntiç, 24. Aleksey İsayev, 13. Bəhlul Mustafazadə (k), 27. Toral Bayramov, 22. Musa Qurbanlı, 29. Marko Veşoviç, 7. Yassin Benzia, 8. Marko Yankoviç, 2. Mateus Silva, 21. Aleksey Kaşuk, 11. Emmanuel Addai.
Oyun qarşılıqlı hücumlarla başlayıb. Cütün birinci görüşü olduğundan, hər iki komanda ehtiyatı əldən vermək istəmirdi. Dəqiqələr keçdikcə futbolçularımız təşəbbüsü ələ alıb. Lakin rəqib müdafiədə boşluq buraxmayıb. İlk yarıda komandalar qol epizodu yaratmaqda çətinlik çəkiblər. Qarşılaşmada hesabı 28-ci dəqiqədə meydan sahibləri penaltidən açıblar.
İkinci hissə komandamızın böyük ərazi üstünlüyü ilə keçib. Rəqibi öz qapısı qarşısına sıxan futbolçularımız bərabərlik qolu üçün hücuma atılıblar. Bir neçə epizodda rəqibin qapıçısı buna mane olub. Bəzi anlarda isə son zərbədə dəqiqlik çatmayıb. Beləliklə, görüş "Araz-Naxçıvan"ın 1:0 hesablı qələbəsi ilə yekunlaşıb.
Qeyd edək ki, komandalar arasında cavab görüşü aprelin 23-də keçiriləcək.
