"Bilirəm ki, "Neftçi" hazırda çempionluğa favoritdir. Hazırda da liderdir. Mən bundan çox razıyam. Çünki uzun illər "Neftçi" bu yerlərdə yox idi. Buna görə çox sevinirəm. Allah qoysa, sona qədər belə qalarlar və çempion olarlar. Yuri Vernidub gəldikdən sonra komandanın səviyyəsini yüksəltdi, yaxşı nəticələr dərhal oldu. Ümid edirdim ki, bu cür də davam edəcəklər. Onlar göstərdi ki, komandanı yaxşı yığırsansa, doğru işləyirsənsə, nəticə öz-özünə gələcək".
Bu sözləri "Neftçi"nin veteran futbolçusu Slavko Georgiyevski deyib.
Şimali makedoniyalı məşqçi sabiq komandasının liderliyini şərh edib. Onun fikrincə, "Sabah" və "Qarabağ" indi də güclüdür, sadəcə "Neftçi" daha yaxşı çıxış edir.
"Sabah" Çempionlar Liqasında əsas mərhələyə düşdü. Ola bilər ki, onların çox oyunu var və yorulublar. Bu da "Neftçi" üçün şansdır. "Qarabağ"ın güclü olmadığını deməzdim. Onlar uzun illərdir çempion olurdular. Yəqin ki, yeni komanda qurmağa çalışdılar, oyun sarıdan da bəzi şeyləri dəyişiblər. "Qarabağ"ın yenidən əvvəlki səviyyəyə çatması üçün zamana ehtiyacı var. "Neftçi"nin bu mövsüm 90 illiyidir. Hazırda da komanda liderdir. Bu yerdə qalmaq üçün eyni tempdə davam etmək lazımdır. "Neftçi" bu cür davam etsə, 100 faiz çempion olacaq", - deyə o sportal.az-a açıqlamasında vurğulayıb.
Georgiyevski "Neftçi"də hansı futbolçunu daha çox bəyəndiyini də dilə gətirib:
"İndi hansısa futbolçunu ayrıca qeyd etmək düzgün çıxmazdı. Çünki futbol tennis deyil, birəbir oynamırlar. Amma Qustavo Klismanı qeyd edə bilərəm. "Qarabağ"la görüşdə də baxdım, yaxşı performansını təəccüblə izlədim. Onu daha çox bəyəndim. Amma ən yaxşısı bütün komandanın yaxşı oynamasıdır, nəinki bir-iki futbolçunun. Vacib olan "Neftçi"dir, hansısa futbolçu yox".