Idman.biz
" Düşünürəm ki, matçın böyük hissəsində həqiqətən çox güclü komandaya qarşı mübarizə apara biləcəyimizi göstərdik".
Bunu "Sabah"ın futbolçusu Velko Simiç UEFA Çempionlar Liqasının əsas mərhələsinin üçüncü turunda evdə "Borussiya Dortmund"a 1:2 hesabı ilə məğlub olduqları oyundan sonra sportify.az-a müsahibəsində deyib.
Həmin müsahibəni təqdim edirik.
– Oyun haqqında fikirləriniz necədir?
– Düşünürəm ki, matçın böyük hissəsində həqiqətən çox güclü komandaya qarşı mübarizə apara biləcəyimizi göstərdik. Təəssüf ki, sonda istədiyimiz nəticəni əldə edə bilmədik. Amma bu performansın üzərində işləyə bilərik və inanıram ki, qrup mərhələsində daha çox xal qazanacağıq.
– Məncə, bu matçda çox yaxşı oynadınız. İkinci hissədə "Borussiya" sizə qarşı daha çox müdafiə futbolu oynadı. Sizcə, Dortmund təmsilçisi "Sabah"dan çəkindi?
– Sizcə, Dortmund "Sabah"dan qorxur? (gülür) Xeyr, belə düşünmürəm. Dortmundun "Sabah"dan qorxduğunu demək, əlbəttə ki, düzgün olmazdı. Amma dediyim kimi, biz onlarla rəqabət apara biləcəyimizi göstərdik. Gələcək oyunlarda diqqət etməli olduğumuz məqam ilk hissənin ilk 15 dəqiqəsi və ikinci hissənin ilk 10-15 dəqiqəsidir. Həmin anlarda sanki meydanda deyildik, oyuna tam hazır görünmürdük. Rəqib də bundan istifadə etdi, çünki çox yüksək keyfiyyətə malik komandadır.
– Düşünürəm ki, bu ay oyun təqviminiz çox çətindir. Növbəti matçınız "Qarabağ"a qarşı olacaq. Bu, həm də derbi deməkdir. Qarşıdakı oyun barədə nə deyə bilərsiniz?
– Bəli, oyun təqvimimiz həqiqətən çətindir. Çempionlar Liqasında matçlarımız var idi, çempionatda "Neftçi" ilə qarşılaşdıq, indi isə bizi "Qarabağ"la oyun gözləyir. Amma bu, bizim istədiyimizdir. Çempionlar Liqasında oynamaq və ən yüksək səviyyədə mübarizə aparmaq istəyirdik. Buna görə də yolumuza davam edəcəyik və hər oyuna ayrı-ayrılıqda köklənəcəyik. İndi bu matçı unutmalı və "Qarabağ"la derbiyə hazırlaşmalıyıq.
