Sport24.az
"Çempionatın ilk dövrəsi kifayət qədər maraqlı və rəqabətli keçdi. Turnir cədvəlinə nəzər salanda görürük ki, bir neçə komanda yüksək pillələr uğrunda mübarizə aparır. Bu da Premyer Liqaya olan marağı artırır". Bu sözləri Sport24.az-a açıqlamasında Vaqif Sadıqov deyib.
Təcrübəli mütəxəssis Misli Premyer Liqasında ilk dövrəni dəyərləndirib:
"İlk dövrədə "Neftçi", "Sabah" və "Qarabağ" kimi iddialı komandalarla yanaşı, "Turan Tovuz"un da çıxışını qeyd etmək lazımdır. Bu komanda iddiasını ortaya qoyub və rəqabətə qoşulub. Digər tərəfdən, "Neftçi"nin illər əvvəlki mövqeyinə qayıtması bizi sevindirir. Azərbaycan futbolunun inkişafı üçün belə köklü klubların çempionluq mübarizəsində iştirakı önəmlidir. Ümumilikdə, ilk dövrənin nəticələrindən razı qalmaq olar. Ancaq qarşıda hələ uzun yol var. Qış fasiləsində heyətlərdə ediləcək dəyişikliklər və komandaların hazırlıq səviyyəsi növbəti dövrələrdə mübarizəyə təsir göstərəcək. İnanıram ki, qarşıdakı oyunlarda daha gərgin və maraqlı mübarizə izləyəcəyik".
Qeyd edək ki, Misli Premyer Liqasının ilk dövrəsindən sonra "Neftçi" 24 xalla turnir cədvəlinə başçılıq edir. "Sabah" və "Turan Tovuz" hərəyə 21 xalla ikinci-üçüncü yerləri bölüşürlər. "Qarabağ" isə 19 xalla dördüncü pillədə qərarlaşıb.
