"Qarabağ" - "Turan Tovuz" - 1:2

Musa Qurbanlı, 7 - Kauan Martins, 89; Otto Con, 90+4

"Qarabağ" növbəti oyununu keçirib. Komandamız Misli Premyer Liqasının XX tur matçında "Turan Tovuz"u qəbul edib. Qarşılaşma Tofiq Bəhramov adına Respublika Stadionunda baş tutub.

Qurban Qurbanov bu görüşdə aşağıdakı start heyətinə şans verib: 1. Şahrudin Məhəmmədəliyev (k), 24. Aleksey İsayev, 13. Bəhlul Mustafazadə, 27. Toral Bayramov, 22. Musa Qurbanlı, 29. Marko Veşoviç, 66. Patrik Andrade, 7. Yassin Benzia, 2. Mateus Silva, 21. Aleksey Kaşuk, 11. Emmanuel Addai.

İlk dəqiqələrdən futbolçularımız təşəbbüsü ələ alıblar. Aramsız hücumlar artıq 7-ci dəqiqədə öz bəhrəsini verib. Çoxgedişli kombinasiyanı Musa Qurbanlı dəqiq zərbə ilə tamamlayaraq hesabı açıb. Bundan sonra da topa nəzarət komandamızın tərəfində olub. Rəqib isə müdafiədə sıxlıq yaradaraq, sürətli əks-hücumlara bel bağlayıb. Belə həmlələr zamanı həm müdafiə xətti, həm də qapıçı Şahrudin Məhəmmədəliyev sayıqlığı əldən verməyib.

İkinci hissə də eyni ssenari ilə başlayıb. Daha çox hücum edən komanda "Qarabağ" olub. Ancaq qonaqların əks-hücumları da kifayət qədər təhlükəli alınırdı. Belə vəziyyətlərdə Şahrudin Məhəmmədəliyev qola imkan vermirdi. Hissənin sonları qarşılıqlı hücumlar şəraitində keçib. 89-cu dəqiqədə kornerdən ötürmədən sonra rəqib hesabı bərabərləşdirib. Görüşə əlavə edilmiş dəqiqələrdə isə "Turan Tovuz" ikinci qolu vuraraq, 2:1 hesablı qələbə qazanıb. Hazırda komandamız 50 xalla turnir cədvəlinə başçılıq edir.

Qeyd edək ki, "Qarabağ" növbəti oyununu fevralın 2-də səfərdə "Zirə"yə qarşı keçirəcək.