Idman.biz
"Qarabağ" futbol komandasının baş məşqçisi Qurban Qurbanov Misli Premyer Liqasının doqquzuncu turunda "Sabah"la səfərdə keçirilən və 0:0 hesabı ilə başa çatan görüşü şərh edib.
İdman.Biz xəbər verir ki, təcrübəli mütəxəssis matçdan sonrakı mətbuat konfransında hər iki komandanın yüksək tempdə mübarizə apardığını bildirib.
Qurbanovun sözlərinə görə, "Sabah"ın formalaşmış və güclü kollektiv olması qarşılaşmanın gərgin keçməsinə təsir göstərib.
"Maraqlı oyun izlədik. Yaxşı mübarizə və dinamika var idi. Son dəqiqələrə qədər yüksək temp qorundu. Qarşımızda çox yaxşı formalaşmış rəqib dayanırdı. Çempionlar Liqasında oynadıqdan sonra daha sərbəst çıxış edən komanda ilə qarşılaşdıq. Texniki səhvlərimiz çox olsa da, futbolçular mübarizədən qopmadılar. Sonadək oynamağa çalışdılar. Belə oyunlar hər bir futbolçunun gələcək inkişafı baxımından əhəmiyyətlidir. Daha yaxşı formada olmalı, fiziki hazırlığımızı artırmalıyıq", - deyə baş məşqçi vurğulayıb.
"Qarabağ"ın son vaxtlar "Sabah" üzərində qələbə qazana bilməməsinin futbolçulara psixoloji təsiri barədə sualı cavablandıran mütəxəssis bunun normal hal olduğunu söyləyib.
"Belə hallar dünya futbolunda da yaşanır. Biz isə əvvəlki nəticələri düşünmədən bu qarşılaşmaya hazırlaşmışdıq", - deyə o qeyd edib.
Qurbanov görüş ərzində cəmi üç əvəzetmədən istifadə etməsinin səbəbini də açıqlayıb. Baş məşqçi oyunun yüksək tempdə keçdiyini və meydandakı tarazlığı pozmaq istəmədiyini bildirib.
"Bəzi dəyişikliklər etmək barədə düşündüm. Ancaq oyun elə tempdə gedirdi ki, onu dayandırmaq və komandanın balansını pozmaq istəmədik. Əsas məqsədimiz həmin dinamikanı qorumaq idi", - deyə çalışdırıcı əlavə edib.
Mütəxəssis komandanın zədəli futbolçuları Martin Zlomisliç və Joni Montielin vəziyyəti barədə də məlumat verib.
Onun sözlərinə görə, əzələ problemi yaşayan Zlomisliçin yaxın günlərdə məşqlərə qayıtması gözlənilir. Montiel isə "Neftçi" ilə qarşılaşmanın son dəqiqələrində əzələsində ağrı hiss edib. Bu səbəbdən futbolçu həftə ərzində komandanın məşqlərində iştirak etməyib.
