Qarabağ FK
Çempionlar Liqasının pley-off mərhələsinin ilk oyunları çərçivəsində keçirilən "Dinamo" (Zaqreb, Xorvatiya) – "Qarabağ" matçından (3:0) sonra komandamızın baş məşqçisi Qurban Qurbanovun mətbuat konfransı baş tutub. Təcrübəli mütəxəssis görüş barədə fikirlərini bildirib:
"Əfsuslar olsun ki, böyük hesabla məğlub olduq. Bu komandanın gücünü bilirdik. Matça pis hazırlaşmamışdıq. Sadəcə, 2-ci, 3-cü qolları buraxdıq. Hətta 4-cü qol ola bilərdi. Oyunun sonlarında demək olar ki, böyük riskə getmişdik. Futbolçularım sonadək çəkinmədi. 0:3 hesabı ilə geridə olanda da hücumda oynamağa çalışdılar. Bəlkə də üçüncü qol artıq oldu. Əgər 3:0 hesabı ilə udublarsa, bunu haqq ediblər. Onları təbrik edirəm. Amma qarşıda cavab görüşü var. İtkilərimiz var və bu, problem yarada bilər. Cavab qarşılaşmasına hazırlaşacağıq. Azarkeşlərimizə yaxşı oyun göstərmək istəyirik. Yaxşı nəticə üçün sonadək meydanda vuruşacağıq. Hər şey cavab oyununa qaldı. Çalışacağıq ki, burdakı bəzi səhvləri Bakıda düzəldək".
Baş məşqçi qol epizodlarının qaçırılmasına münasibət bildirib: "Komandada eyforiya olduğuna inanmıram. Çünki futbolçuları psixoloji baxımdan hazırlamışdıq. Belə eyforiya olsaydı, onlar oyundan tam qopardı. Xeyli sayda qol epizodlarımız oldu. Amma rəqibin qapıçısı, müdafiəçiləri yaxşı oyun göstərdilər. Bəzən sonda müdaxilə edirdilər. Futbolda belə hallar olur ki, çox sayda qol epizodundan istifadə edə bilmirsən. Buna görə narahat deyiləm. Əgər bu imkanları yaradırıqsa, deməli komanda düzgün oyun qura bilir. Bakıda daha rahat olacaqlar. Futbolçuların çoxu ilk dəfə Çempionlar Liqasının pley-offunda oynayırdı. Görüşün ranqı artdıqca həyəcan və məsuliyyət də çoxalır. Ola bilər ki, bu həyəcan son vuruşlarda mane olurdu. Onları qınamıram. Oyuna müdaxilə olunası səbəb yox idi. Bir dəyişiklik etdik. Son 10 dəqiqədə tam açıq futbol getdi. Bizi əks-hücumda daha çox tutdular. Belə görüşlərdə həyəcan mane olur. Amma səbəb axtarmalı deyilik. Düzgün analiz edib Bakıda çatışmayan cəhətləri aradan qaldırmağa çalışmalıyıq".
