Qarabağ FK
UEFA Çempionlar Liqasının III təsnifat mərhələsinin ilk oyunları çərçivəsində keçirilən "Qarabağ" – "Lüdoqorets" matçından (1:2) sonra komandamızın baş məşqçisi Qurban Qurbanovun mətbuat konfransı təşkil olunub. Təcrübəli mütəxəssis qarşılaşma barədə fikirlərini açıqlayıb:
"Həqiqətən bərk, çox təcrübəli komandaya qarşı oynayırdıq. Futbolçularım çox güc sərf etdilər. Çox sərt oynayan, fiziki göstəriciləri yüksək olan komanda ilə qarşılaşırdıq. İnanıram ki, bu, ilk hissədir, ikincisi Bolqarıstanda olacaq. Səfərə qalib gəlmək üçün gedəcəyik. Lazım olsa, hər hansı risklərə gedəcəyik. Bu gün Çempionlar Liqasının matçı olduğu hiss olunurdu. Qarşımızda təcrübəli, yaxşı bir komanda idi. Futbolçularım sona qədər inanırdılar. "Lüdoqorets"ə qalib də gələ bilərdik, uduza da bilərdik. Bu gün məğlub olmuşuq. Bu, o demək deyil, hər şey bitib. Bolqarıstanda səliqəli, dəqiq oynamağa çalışacağıq. Futbolçularım qarşıdakı günlərdə yaxşı hazırlaşacaqlarına, matça maksimum nəticə üçün çıxa biləcəklərinə inanıram. Bugünkü görüşdə stadionda yaxşı ab-hava var idi, azarkeşlərə təşəkkür edirəm".
Baş məşqçi Premyer Liqanın II turunun görüşü və Bolqarıstandakı səfər qarşılaşması barədə də danışıb: "Üç gündən sonra çempionat oyunumuz var. Həmin matça hazırlaşırıq. Digər futbolçularımızın oynamasına ehtiyac var. Onların da idman formasını qaytarması lazımdır. Növbəti çempionat görüşünü də oynayacağıq. Əlbəttə ki, "Ludoqorets"in oyunçularının fərdi keyfiyyətləri yüksəkdir. Amma futbolçularımı onlardan zəif saymıram. Oyunçularıma daha çox güvənirəm. Rəqib 9 ildir ki, qruplarda oynayır. Belə oyunlara tam hazırdırlar. Mən rəqibi ciddiyə almışdım. Bu komandanın gücünü də bilirdim. İndi onları daha yaxından tanıdıq. Səfərdə istədiyimiz, düşündüyümüz kimi alınsa, futbolçuları hazırlasa bilsə, yaxşı nəticə əldə edəcəyik. Rəqibin üstünlüklərindən birincisi təcrübə, ikincisi oyunçuların fərdi ustalığı idi, sürətli, dinamik, fiziki cəhətdən güclüdürlər. "Ludoqorets" müdafiədə 90 dəqiqə oynamağı bacaran komandadır. Amma bizim xeyli sayda yaxşı hücumlarımız oldu. Bu hallardan çəkinmirik. Əksinə, necə müdaxilə etmək lazımdır, onu düşünürük. Qarşıdakı matçda daha səliqəli və dəqiq olmalıyıq".
