Qarabağ FK
UEFA Çempionlar Liqasının pley-off mərhələsinin cavab oyunları çərçivəsində keçiriləcək "Qarabağ" – "Dinamo" (Zaqreb, Xorvatiya) matçından öncə komandamızın baş məşqçisi Qurban Qurbanov və müdafiəçisi Bəhlul Mustafazadənin mətbuat konfransı təşkil olunub. Təcrübəli mütəxəssis sabah baş tutacaq görüş barədə fikirlərini bildirib:
"Çox vacib oyundur. Hesabda geridə olsaq da, Çempionlar Liqasının Liqa mərhələsində iştirak etmək böyük şansdır. Komandamız pis hazırlaşmayıb. Üç top fərqi ilə geridə olsaq da, inamımız böyükdür. Görüşə hazırlığımız yaxşı keçdi. Qalibiyyət üçün hər şeyi etməyə çalışacağıq. Azarkeşlərimizin oyunumuzdan razı qalmasını istərdik. Bu görüşə əsl final matçı kimi hazırlaşmışıq. Rəqibimizi tanıyırıq. Bilirik ki, iddialı komandadır. Komandama inanıram, güvənirəm. Sabah yaxşı nəticə üçün hər bir futbolçu karyerasının ən yaxşı oyununu oynamalıdır".
Baş məşqçimiz heyət barədə də danışıb: "Qapıçı ilə bağlı sabaha kimi vaxtımız var. Oyuna qədər tam qərar verəcəyik. Marko Veşoviçin durumu pis deyil. İki gün əvvəl komandaya qoşulub. Bu gün də komanda ilə məşq edəcək. Sabah tibbi müayinəsindən sonra "23-lük"də ola bilər. Marko Yankoviç isə fərdi məşq edir. Julio Romaonun cəzalı duruma düşüb-düşməməsi ilə bağlı şübhəmiz var idi. UEFA-dan cavab gəldi və dedilər ki, siz haqlısız, Romao oynayacaq. Qarşımızda hesabda 3:0 öndə olan, böyük təcrübəyə malik "Dinamo" var. Bəzən təkcə cəsarət, istək olanda, istəyimiz alınmaya bilər. Səfərdə xeyli sayda qol epizodlarımız oldu. Bu dəfə daha səliqəli, daha dəqiq oynamağa çalışmalıyıq".
Bəhlul da sabahkı qarşılaşmadan gözləntilərini açıqlayıb: "Bizi gərgin və maraqlı oyun gözləyir. Ümidliyik, hədəfimiz Çempionlar Liqasının Liqa mərhələsinə yüksəlməkdir. Bu matça yaxşı hazırlaşmışıq. Hər şey edəcəyik ki, mərhələni biz keçək. Qol buraxırıqsa, müdafiənin də səhvləri var. Çalışırıq ki, onları təhlil edib, nəticə çıxaraq. Təcrübəmiz var, hər kəs sakitdir və hamı inanır. Daha yaxşı oyun göstərməyə çalışacağıq".
Qeyd edək ki, sabah Tofiq Bəhramov adına Respublika stadionunda keçiriləcək "Qarabağ" – "Dinamo" matçı saat 20:45-də başlayacaq.
