Qarabağ FK
Komanda.az saytının sorğusunda ilin məşqçisi seçilən "Qarabağ"ın baş məşqçisi Qurban Qurbanovun mükafatlandırma mərasimi keçirilib. "CanSports"un təşkilatçılığı ilə keçirilən tədbirdə ölkənin idman ictimaiyyətinin nümayəndələri və jurnalistlər iştirak ediblər.
Təcrübəli mütəxəssisə mükafatı Komanda.az saytının baş redaktoru Rəşad Ergün təqdim edib. Qurban Qurbanov 14-cü dəfə ilin ən yaxşı məşqçisi seçilib.
Baş məşqçimiz çıxışında bu mükafatı 14-cü dəfə qazanması barədə fikirlərini bildirib: "Artıq 14-cü dəfədir ki, ilin ən yaxşı məşqçisi adına layiq görülürəm. Hisslərimi sözlə ifadə etmək çox çətindir. Həqiqətən, mənim üçün çox xoş oldu. Hər dəfə ilin ən yaxşı məşqçisi seçiləndə məsuliyyət daha çox artır. Məni bu ada layiq görənlərə dərin təşəkkürümü bildirirəm. Təbii ki, mənə göstərilən etimadı doğrultmaq üçün hər zaman əlimdən gələni edirəm".
Qeyd edək ki, Qurbanov 64 jurnalist arasında təşkil olunan səsvermədə 47 səslə birinci olub. O, 2009-cu ildən keçirilən sorğularda bu mükafata layiq görülür.
