Qurban Qurbanov: “Çox vacib bir oyun oldu”

Misli Premyer Liqasının IV turunun "Qarabağ" – "Turan Tovuz" oyunundan (0:1) sonra komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis matçla bağlı fikirlərini açıqlayıb:

"Bizim üçün çox vacib bir oyun oldu. Qarşımızda çox yaxşı müdafiə olunan, vuruşan komanda var idi. Kurban Berdıyev müdafiəmi qurmaqda tanınmış mütəxəssislərdən biridir. Çox keyfiyyətli əks-hücumları olur. Bunu təxmini bilsək də, "Turan Tovuz"u yaxşı tanımırdıq. Bizim fikrimiz istər-istəməz daha çox avrokuboklardadır. Rəqib istəyi, davranışı, oyun nizam-intizamı ilə qələbəni haqq edib. Komandanı və Tovuz azarkeşlərini təbrik edirəm, orada futbola həmişə maraq böyük olub. Bu gündə şahid olduq ki, stadionda Tovuzdan gələn nə qədər azarkeş var idi. Çempionat boyu yaxşı rəqibimiz olacaq. Öz azarkeşlərimizə təşəkkür edirəm, sonadək yanımızda idilər".

Baş məşqçimiz Çempionlar Liqasındakı mübarizənin çempionat oyunlarına təsiri barədə də danışıb: "Təkcə Zaqrebdə deyil, Avropada oynadığımız matçların bu qarşılaşmaya da təsiri var. Fərqli heyət oynayır, bəzi rotasiyalar edirik. İki heyətlə 3-4 gündən bir oynayanda futbolçular hamısı birgə məşq edə bilmir. Məşq dinamikası, keyfiyyəti pozulur. Belə sıx qrafikdə futbolçuların hamısının sağlam olması da vacibdir. Marko Veşoviçlə Marko Yankoviçin yoxluğu iki futbolçunun olmaması deməkdir. Bizə qarşı hamı çox ciddi hazırlaşır. Bu da normaldır. Hər futbolçuya inamla, hörmətlə yanaşıram. Belə məğlubiyyətlər komandaya faydası daha çox olur. Bunun tez olması işimizə daha məsuliyyətlə, düzgün yanaşmağımıza kömək edəcək. Mateus Koxalskinin ilk oyunu idi. Lazım olan epizodlarda düzgün qərarlar verdi".