Qurban Qurbanov: “Çalışacağıq ki, azarkeşlər baxımlı oyun izləsinlər”

Çempionlar Liqasının III təsnifat mərhələsinin ilk oyunları çərçivəsində baş tutacaq "Qarabağ" – "Lüdoqorets" matçından əvvəl komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis sabahkı qarşılaşma barədə fikirlərini bildirib:

"Çox vacib matça çıxacağıq. Bizi yaxşı oyun gözləyir. Çünki yaxşı təcrübəsi, oyunçuların fərdi keyfiyyətləri yüksək olan komandaya qarşı oynayacağıq. Futbolçularımızı matça hazırlamışıq. Amma əvvəlki qarşılaşmalardan fərqli bu dəfə tam istədiyimiz kimi hazırlaya bilmədik. Çünki çempionatda matçımız var idi. Məşqimiz tam istədiyimiz keyfiyyətdə keçmədi. Oyunun vacibliyini hamımız bilirik. Futbolçular daha yaxşı performans göstərməyə hazırdırlar. Çalışacağıq ki, həmişə olduğu kimi azarkeşlər baxımlı oyun izləsinlər".

Baş məşqçi rəqib barədə də danışıb: "Mərhələ iki matçdan ibarətdir. "Lüdoqorets"in oyununa baxanda, təcrübəsi məni cəlb etdi. Çox soyuqqanlıdırlar. Oyunu yaxşı idarə edirlər. Hansısa dəqiqələrdə komanda öz oyununu itirir, düşündüklərini meydanda edə bilmir. Amma "Lüdoqorets" istənilən anda, lazım olanı edə bilir. Əvvəlki oyunların nəticəsinə baxmırıq. Bəlkə də komandada bir az qeyri-ciddilik olub. Amma ilk oyunda nəticə əldə ediblər, cavab matçında isə nəticəni qoruyublar".

Qubanov pley-off mərhələsinin bugünkü püşkatması barədə fikirlərini bildirib: "Həmişə istənilən püşkə normal yanaşmışam. Hər bir komanda öz ölkəsinin çempionudur. Onlara qeyri-ciddi yanaşa bilmərik. Rəqiblər də bizə qeyri-ciddi yanaşa bilməzlər. Bizi indi düşündürən "Lüdoqorets"dir. Ardıcıl 9 mövsüm avrokubokların qrup mərhələsində oynamaq çox böyük nailiyyətdir. Çox diqqətli olmalıyıq. Hansısa dəqiqələrdə üstünlüyümüz ola bilər, amma bu, bizi aldatmamalıdır. Fərdi keyfiyyətləri üstün olan komandalar var. Çox ciddi olmalıyıq".