Idman.biz
"Qarabağ"ın sabiq futbolçusu Dino Ndlovu biznes fəaliyyəti zamanı böyük maliyyə itkisi ilə üzləşib.
İdman.Biz Cənubi Afrika mediasına istinadən xəbər verir ki, 36 yaşlı keçmiş hücumçu uğursuz beynəlxalq biznes sövdələşməsi nəticəsində təxminən altı milyon rand (CAR-ın milli valyutası, 617 min AZN) itirdiyini açıqlayıb.
Məlumata görə, hadisə Dubayla əlaqəli şəxslərin iştirak etdiyi biznes razılaşması zamanı baş verib. Ndlovunun sözlərinə əsasən, sövdələşmədə iştirak edən şəxslər pulu aldıqdan sonra yoxa çıxıblar.
Futbolçunun ilkin itkisi beş milyon randı ötüb. O, vəsaitini geri qaytarmaq məqsədilə şəxsi detektiv də tutub və bunun üçün əlavə bir milyon rand xərcləyib.
Ndlovu yaşadığı hadisədən sonra bizneslə məşğul olmaq istəyən şəxsləri tərəfdaşlarını diqqətlə araşdırmağa, müqavilələrin hüquqi tərəflərinə xüsusi əhəmiyyət verməyə çağırıb.
Hazırda sabiq futbolçu fəaliyyətini yeni istiqamətdə davam etdirir. O, xrom hasilatı sahəsinə sərmayə yatırmağa başlayıb. Ndlovu bundan əvvəl gecə klubu, istirahət məkanı və qonaq evi biznesi ilə də məşğul olub.
Keçmiş hücumçu gələcəkdə futbol klubu sahibi və oyunçu agenti olmaq niyyətindədir.
Qeyd edək ki, Dino Ndlovu 2016–2018-ci illərdə "Qarabağ"ın formasını geyinib. O, 2017-ci ildə Danimarkanın "Kopenhagen" klubuna qarşı səfər oyununda vurduğu qolla Ağdam təmsilçisinin tarixində ilk dəfə UEFA Çempionlar Liqasının qrup mərhələsinə yüksəlməsində mühüm rol oynayıb. O, Ağdam klubunun heyətində 54 oyun keçirib və 19 qol, 7 asist müəllifidir.
Cənubi Afrika Respublikası millisinin sabiq üzvü karyerası ərzində Azərbaycanla yanaşı, İsrail, Kipr, Çin və Türkiyədə də çıxış edib.
