Qarabağ FK
"Turan Tovuz" – "Qarabağ" – 1:4
Aleks Souza, 16 - Kadi Borqes, 30 (pen.), 84, Nəriman Axundzadə, 32, Aleksey Kaşuk, 90+1
Misli Premyer Liqasında IV dövrəyə start verilib. XXVIII turun ilk matçı Tovuzda baş tutub.
"Qarabağ" səfərdə "Turan Tovuz"la görüşüb. Oyuna fəal başlayan komandamız ilk dəqiqələrdən rəqib qapısına təzyiq yaradıb. Bu, hesabın açılması ilə nəticələnib. Kadi Borqes penaltidən fərqlənib.
Hesab açıldıqdan sonra meydan sahibləri fəallaşıblar və matç qarşılıqlı hücumlarla keçib. Rəqib hissənin ortalarında hesabı bərabərləşdirsə də, iki dəqiqə sonra komandamız yenidən fərqlənib. Bu dəfə Nəriman Axundzadə qol sevinci yaşayıb.
İkinci hissədə oyunun ssenarisi dəyişməyib. Azarkeşlər əsasən qarşılıqlı hücumlar izləyiblər. Lakin komandamız topa daha çox nəzarət edib.
İlk yarı ilə müqayisədə qol epizodları az olsa da, futbolçularımız bir neçə dəfə fərqi artırmaq imkanı qazanıblar. Lakin bu hücumlar yalnız görüşün sonlarında bəhrəsini verib. Kadi dublunu rəsmiləşdirib. Ardınca Aleksey Kaşuk böyükhesablı qələbə gətirən topu vurub.
Beləliklə, "Qarabağ" Tovuz səfərində 4:1 hesablı qələbə qazanıb. Premyer Liqanın lideri olan komandamız xallarının sayını 67-yə çatdırıb.
Qeyd edək ki, komandamız növbəti oyununu aprelin 2-də keçirəcək. "Qarabağ" Azərbaycan kubokunun yarımfinal mərhələsinin ilk matçında "Araz-Naxçıvan"ın qonağı olacaq.
