“Qarabağ” və Azərbaycan İdman Akademiyası birgə futbol məşqçiləri proqramını uğurla tamamladı – 30 məşqçiyə sertifikat təqdim edildi

"Qarabağ" və Azərbaycan İdman Akademiyasının birgə həyata keçirdiyi "Futbol məşqçilərinin peşəkar inkişaf proqramı" başa çatıb.

İdman.Biz xəbər verir ki, oktyabrın 19-da Azərbaycan İdman Akademiyası (ASA) və "Qarabağ" Futbol Klubu Akademiyasının əməkdaşlığı çərçivəsində həyata keçirilən proqramın yekunlarına həsr olunmuş sertifikat təqdimetmə mərasimi keçirilib. Tədbir Azərbaycan Dövlət Bədən Tərbiyəsi və İdman Akademiyasının akt zalında baş tutub.

Tədbirdə "Qarabağ"ın baş direktoru Emrah Çelikel və Azərbaycan İdman Akademiyasının rektoru Fuad Hacıyev çıxış ediblər.

Proqram çərçivəsində "Qarabağ" klubunun məşqçilərinə gənc futbolçularla peşəkar iş, onların fiziki və mənəvi inkişafına dair elmi və praktiki əsaslara söykənən təlimlər keçirilib.

Daha sonra ASA-nın tədris işləri üzrə prorektoru Ülkər Babayeva təlim proqramı haqqında təqdimat edib, Ömürboyu təhsil şöbəsinin müdiri Lalə Məmmədova isə proqramın nəticələri barədə hesabatla çıxış edib. Tədbir çərçivəsində proqramın fəaliyyətini əks etdirən videoçarx nümayiş olunub.

Sonda proqramı uğurla başa vurmuş 30 futbol məşqçisinə sertifikatlar təqdim edilib.

Qeyd edək ki, proqram "Qarabağ" FK Akademiyası ilə Azərbaycan İdman Akademiyası arasında əməkdaşlığın və futbol məşqçilərinin peşəkar inkişafına yönəlmiş fəaliyyətin tərkib hissəsidir.

Foto: İslam Atakişiyev