Qarabağ FK
"Qarabağ" - "Araz-Naxçıvan" - 2:0
Yassin Benzia, 41. Abdullah Zubir, 71
"Qarabağ" növbəti oyununu keçirib. Komandamız Misli Premyer Liqasının XVIII tur matçında "Araz-Naxçıvan"ı qəbul edib. 2024-cü ilin son qarşılaşması Tofiq Bəhramov adına Respublika Stadionunda baş tutub.
Qurban Qurbanov bu görüşdə aşağıdakı start heyətinə şans verib: 1. Şahrudin Məhəmmədəliyev, 20. Riçard Almeyda (k), 27. Toral Bayramov, 90. Nəriman Axundzadə, 29. Marko Veşoviç, 66. Patrik Andrade, 7. Yassin Benzia, 18. Olavio Juninyo, 2. Mateus Silva, 6. Julio Romao, 11. Emmanuel Addai.
İlk dəqiqələrdən futbolçularımız oyuna nəzarəti ələ keçiriblər. Qonaq komanda sürətli əks-hücumlar sayəsində təhlükəli vəziyyət yaratmağa çalışırdı. Komandamızın həmlələrinin qarşısını gah rəqib qapıçı kəsirdi, gah da son zərbə qeyri-dəqiq alınırdı. Bu hücumlar 41-ci dəqiqədə öz bəhrəsini verib. Nəriman Axundzadənin ötürməsini Yassin Benzia yaxın məsafədən qola çevirib.
İkinci hissə qarşılıqlı hücumlarla başlayıb. Hər iki tərəf təhlükəli hücumlarla yadda qalıb. 71-ci dəqiqədə komandamız rəqibi ikinci dəfə mərkəzə dəvət edib. Nəriman Axundzadə bu dəfə Abdullah Zubirin qolunun məhsuldar ötürməsini verib. Bu, qarşılaşmada vurulan son qol olub.
Beləliklə, "Qarabağ" ev oyununda 2:0 hesabı ilə qalib gəlib. Bu qələbədən sonra xallarının sayını 47-yə çatdıran komandamız qış fasiləsinə turnir cədvəlinin zirvəsində yollanıb.
Qeyd edək ki, "Qarabağ" növbəti oyununu 2025-ci il yanvarın 17-19-u aralığında keçirəcək. XIX turun səfər matçında rəqib "Şamaxı" olacaq.
