Qarabağ FK
"Qəbələ" - "Qarabağ" – 0:2
Abdullah Zubir, 7. Murad Musayev, 90+1 (avtoqol)
Komandamız Azərbaycan Kubokunun 2024/2025-ci illər mövsümündə mübarizəyə start verib. Qurban Qurbanovun yetirmələri 1/8 final mərhələsində Qəbələ şəhər stadionunda "Qəbələ"nin qonağı olub.
Komandamız qarşılaşmaya aşağıdakı heyətlə çıxıb: 1. Şahrudin Məhəmmədəliyev, 20. Riçard Almeyda (k), 13. Bəhlul Mustafazadə, 44. Elvin Cəfərquliyev, 29. Marko Veşoviç, 10. Abdullah Zubir, 66. Patrik Andrade, 7. Yassin Benzia, 8. Marko Yankoviç, 18. Olavio Juninyo, 21. Aleksey Kaşuk.
Oyun komandamızın üstünlüyü şəraitində başlayıb. Futbolçularımız ilk dəqiqələrdən rəqib qapısı qarşısında təhlükəli vəziyyətlər yaratmağa müvəffəq olublar. Bu isə erkən qolun vurulması ilə nəticələnib. 7-ci dəqiqədə Abdullah Zubir qapıçı ilə təkbətək vəziyyətdə toru silkələyərək hesabı açıb. Erkən qoldan sonra da komandamız səfər matçında təşəbbüsü əldən verməyib. İkinci qol üçün bir neçə şans əldə olunsa da, fərqlənmək mümkün olmayıb.
İkinci hissə də komandamızın nəzarəti altında keçib. Topa daha çox nəzarət edən futbolçularımız müdafiədə etibarlı oynamaqla yanaşı, hücumda qol axtarışında olublar. Cari mövsümdə ilk oyununa çıxan Şahruddin Məhəmmədəliyev isə bir epizodda komandamızı qoldan xilas edib. Matçın sonlarında təzyiqi artıran futbolçularımız ardıcıl qol epizodları ilə rəqib qapıçısını tez-tez narahat ediblər. Bunun bəhrəsi 90+1-ci dəqiqədə gəlib.
Nəticədə 2:0 hesablı qələbə qazanan komandamız 1/4 final mərhələsinə vəsiqə əldə edib. Bu mərhələdə rəqib "Səbail" olacaq. Mərhələnin oyunları 2025-ci ilin fevralında keçiriləcək.
