Mərkəzi Arenada 3:3 Bərabərlik

"Qarabağ" - "Neftçi" – 3:3

Aleksey Kaşuk, 18; Renaldo Sefas, 89; Kadi Borqes, 90+5 - Qustavo Klisman, 11, 34; Draqolyub Saviç, 52

Komandamız növbəti oyununu keçirib. "Qarabağ" Misli Premyer Liqasının VIII tur matçına çıxıb. Qurban Qurbanovun baş məşqçisi olduğu komanda "Neftçi"ni qəbul edib.

Komandamız Tofiq Bəhramov adına Respublika stadionundakı görüşə aşağıdakı start heyəti ilə çıxıb: 1. Şahruddin Məhəmmədəliyev (k), 8. Marko Yankoviç, 20. Kadi Borqes, 2. Mateus Silva, 5. Bruno Lanqa, 9. Zakaria Savo, 25. Cebrail Makreçkis, 21. Aleksey Kaşuk, 7. Jali Muaddib, 35. Pedro Bikalyo, 4. Bense Varkonyi.

Oyun qarşılıqlı hücumlarla başlayıb. Topa daha çox futbolçularımız nəzarət edib. Lakin hesabı 11-ci dəqiqədə qonaqlar açıblar. Buna baxmayaraq, tezliklə bərabərlik təmin olunub. Aleksey Kaşuk qapıçı ilə təkbətək imkandan dəqiq yararlanıb.

Bundan sonra da komandamız daha fəal nəzərə çarpıb. Buna rəğmən rəqib 34-cü dəqiqədə əks-hücumdan yenidən önə keçib.

İkinci hissənin əvvəllərində qonaqlar 3-cü qolu vurublar. Dərhal nəzarəti ələ keçirən komandamız rəqibi meydanın özünə aid hissəsinə sıxıb. Futbolçularımız çoxgedişli ötürmələrlə qol axtarışında olublar.

Bu təzyiq son dəqiqələrdə öz bəhrəsini verib. Əvvəlcə 89-cu dəqiqədə Renaldo Sefas fərqi minimuma endirib. Əlavə edilmiş sonuncu dəqiqədə isə Kadi Borqes hesabı bərabərləşdirib.

Beləliklə, oyun 3:3 hesablı heç-heçə yekunlaşıb. "Qarabağ" 17 xalla üçüncü pillədə qərarlaşır.

Qeyd edək ki, komandamız IX turda "Sabah"ın qonağı olacaq. Oktyabrın 25-də "Dalğa Arena"da keçiriləcək görüş saat 18:00-da başlayacaq.