Komandamız inamlı qələbə ilə liderliyini qorudu

"Qarabağ" - "Zirə" – 4:0

Mateus Silva, 2. Yassin Benzia, 51 (pen.). Bəhlul Mustafazadə, 59. Aleksey Kaşuk, 68

Komandamız növbəti oyununu keçirib. Qurban Qurbanovun yetirmələri Misli Premyer Liqasının XIII turu çərçivəsində Tofiq Bəhramov adına Respublika Stadionunda "Zirə"ni qəbul edib.

Komandamız qarşılaşmaya aşağıdakı heyətlə çıxıb: 97. Fabian Buntiç, 24. Aleksey İsayev, 13. Bəhlul Mustafazadə (k), 44. Elvin Cəfərquliyev, 22. Musa Qurbanlı, 90. Nəriman Axundzadə, 29. Marko Veşoviç, 7. Yassin Benzia, 2. Mateus Silva, 6. Julio Romao, 15. Leandro Andrade.

Futbolçularımız matça sürətli başlanğıc ediblər. Nəticədə artıq 2-ci dəqiqədə hesabı açmaq mümkün olub. Künc nöqtəsindən ötürməni Mateus Silva başla qola çevirib. Bundan sonra da üstünlük komandamızın tərəfində olub. Müdafiədə etibarlı çıxış edən Qurban Qurbanovun yetirmələri kəsərli hücumlar təşkil etsələr də, fasiləyə qədər hesab dəyişməyib.

Lakin ikinci hissədə komandamız qısa müddətdə rəqibi daha iki dəfə mərkəzə dəvət edib. Əvvəlcə Yassin Benzianın penalti zərbəsi qarşısıalınmaz olub. Bir qədər sonra sol cinahdan ötürməni Bəhlul Mustafazadə başla dəqiq tamamlayıb. Qarşılaşmada son nöqtəni Aleksey Kaşuk qoyub.

Beləliklə, 4:0 hesablı inamlı qələbə qazanan komandamız Premyer Liqada xallarının sayını 31-ə çatdırıb və liderliyini qoruyub.

Qeyd edək ki, ölkə çempionatında növbəti matçını noyabrın 23-də keçirəcək "Qarabağ" səfərdə "Səbail"lə qarşılaşacaq.