Komandamız Avropa Liqasında son oyununu keçirdi

"Olimpiakos" (Yunanıstan) - "Qarabağ" - 3:0

Ayub El Kaabi, 56, 60. Giulian Biankone, 89

"Qarabağ" 2024/2025 mövsümündə son avrokubok oyununu keçirib. Qurban Qurbanovun yetirmələri Avropa Liqasının Liqa mərhələsində səkkizinci matçına çıxıb. Komandamız Pireydə yerləşən "Georgios Karaiskakis" stadionunda Yunanıstanın "Olimpiakos" klubunun qonağı olub.

Komandamız oyunu aşağıdakı heyətlə keçirib: 99. Mateuş Koxalski, 13. Bəhlul Mustafazadə, 81. Kevin Medina, 2. Mateus Silva (29. Marko Veşoviç, 79), 44. Elvin Cəfərquliyev (27. Toral Bayramov, 72), 6. Julio Romao, 8. Marko Yankoviç, 7. Yassin Benzia, 15. Leandro Andrade (21. Aleksey Kaşuk, 72), 10. Abdullah Zubir (k) (11. Emmanuel Addai, 79), 90. Nəriman Axundzadə (22. Musa Qurbanlı, 72).

Oyun yüksək tempdə başlayıb. Hər iki komanda hücumda fəal olmağa çalışırdı. Sürətli hücumlar bir-birini əvəz edirdi. Futbolçularımız Konfrans Liqasının son qalibi ilə səfərdə qarşılaşmasına baxmayaraq, çəkinmədən hücuma atılır, qapıçını tez-tez narahat edirdilər. Lakin gah müdafiəçilər son anda müdaxilə edirdilər, gah da rəqibin qapıçısı əla qurtarışla komandasını qoldan xilas edirdi. Matçda dinamika, yüksək temp fasiləyə qədər davam edib. Ancaq komandalar hesabı aça bilməyiblər.

İkinci hissə də eyni ssenaridə başlayıb. Amma meydan sahibləri qısa müddət ərzində iki qol vurub. Bundan sonra komandamız hücumlarının kəsərini artırsa da, həmlələr bir nəticə verməyib. Son dəqiqələrdə daha bir dəfə fərqlənən "Olimpiakos" 3:0 hesablı qələbə qazanıb.

Beləliklə, komandamız Avropa Liqasının Liqa mərhələsini 3 xalla başa vurub.