“Futbolçularımız yaxşı oyun göstərməyə çalışacaqlar”

UEFA Avropa Liqasının Liqa mərhələsinin I turu çərçivəsində keçiriləcək "Tottenhem" (İngiltərə) - "Qarabağ" matçından öncə komandamızın baş məşqçisi Qurban Qurbanov və əlcəzairli yarımmüdafiəçisi Yassin Benzianın mətbuat konfransı təşkil olunub. Təcrübəli mütəxəssis sabah baş tutacaq görüş barədə fikirlərini bildirib:

"Rəqib haqqında çox danışmağa ehtiyac yoxdur. Çünki dünyanın ən güclü çempionatında iştirak edən və həmişə liderlər sırasında yer alan komandaya qarşı oynayacağıq. Sabahkı oyuna hazırıq. Düzgün, səliqəli, intizamlı oynamağa çalışacağıq. Belə stadionda, bu cür azarkeşlər qarşısında oynamaq hər bir futbolçumuzun böyüməsi baxımından yaxşı təcrübədir. Futbolçularımız çox güc sərf edərək yaxşı oyun göstərməyə çalışacaqlar".

Qurban Qurbanov Avropa Liqasının 2015/2016-cı il mövsümündə qarşılaşdıqları "Tottenhem"in həmin vaxtkı heyəti ilə hazırki kollektivini də müqayisə edib: "Tottenhem"lə keçirdiyimiz oyun yadımdadır. Həmin vaxt da yaxşı heyətləri və güclü baş məşqçiləri var idi. Ancaq bu gün futbol daha dinamik və sürətli keçir. Xüsusən də, hazırkı baş məşqçiləri gəldikdən sonra "Tottenhem" İngiltərə Premyer Liqasının ən sürətli pressinq edən komandalarından birinə çevrilib. 2015-ci illə müqayisədə bugünkü "Tottenhem" tam fərqlidir".

Yassin Benzia isə rəqibin güclü olmasına baxmayaraq, layiqli rəqabət aparacaqlarına inandığını söyləyib: "Bura özümüzü yaxşı tərəfdən göstərmək üçün gəlmişik. İnanıram ki, bizim üçün yaxşı oyun olacaq".

Qeyd edək ki, sabah "Tottenhem" stadionunda keçiriləcək qarşılaşma Bakı vaxtı ilə saat 23:00-da başlayacaq.