Qarabağ FK
"Qarabağ" – "Sabah" - 1:1
Abdullah Zubir, 17 – Cesse Sekidika, 35
"Qarabağ" növbəti oyununu keçirib. Komandamız Misli Premyer Liqasının XXIV tur matçında "Sabah"ı qəbul edib.
Baş məşqçimiz Qurban Qurbanov bu görüşdə aşağıdakı start heyətinə şans verib: 1. Şahrudin Məhəmmədəliyev, 55. Bədavi Hüseynov (k), 13. Bəhlul Mustafazadə, 27. Toral Bayramov, 10. Abdullah Zubir, 66. Patrik Andrade, 7. Yassin Benzia, 9. Kadi Borqes, 2. Mateus Silva, 19. Redon Cica, 15. Leandro Andrade.
Tofiq Bəhramov adına Respublika Stadionunda təşkil olunan oyun gərgin mübarizə şəraitində keçib. İlk dəqiqələrdən hər iki komanda sürətli futbola üstünlük verib. Çox keçmədən təşəbbüsü ələ alan futbolçularımız tezliklə hesabı açmağa müvəffəq olublar. Leandro Andradenin sağ cinahdan uzaq küncə ötürməsi zamanı topu qəbul edən Abdullah Zubirin zərbəsi qarşısıalınmaz olub. Hissənin sonlarına doğru rəqib bərabərlik qolunu vurub.
Yüksək templi mübarizə ikinci hissədə də davam edib. Yaradılan qol vəziyyətlərini qola çevirmək mümkün olmayıb və oyun 1:1 hesablı heç-heçə yekunlaşıb. Turnir cədvəlinə başçılıq edən komandamız bu nəticədən sonra xallarının sayını 57-yə çatdırıb.
Qeyd edək ki, "Qarabağ" ölkə çempionatında növbəti oyununu martın 3-də səfərdə "Sumqayıt"a qarşı keçirəcək.
