Evdə bir qol üstünlüyü ilə qələbə

"Qarabağ" - "Zirə" – 1:0

Kadi Borqes, 15

"Qarabağ" növbəti oyununu keçirib. Komandamız Misli Premyer Liqasının XXIX tur matçında "Zirə"ni qəbul edib.

Baş məşqçimiz Qurban Qurbanov bu görüşdə aşağıdakı start heyətinə şans verib: 99. Mateus Koxalski, 13. Bəhlul Mustafazadə, 44. Elvin Cəfərquliyev, 27. Toral Bayramov, 90. Nəriman Axundzadə, 10. Abdullah Zubir (k), 7. Yassin Benzia, 8. Marko Yankoviç, 9. Kadi Borqes, 2. Mateus Silva, 15. Leandro Andrade.

Tofiq Bəhramov adına Respublika stadionunda təşkil olunan oyundan əvvəl klubumuzun prezidenti Tahir Gözel komandanın heyətində 300 oyun keçirən kapitan Abdullah Zubirə xatirə forması hədiyyə edib.

Matça sürətli başlayan futbolçularımız artıq 15-ci dəqiqədə hesabı açıblar. Kadi Borqes cərimə zərbəsindən gözəl qola imza atıb. Hissənin qalan dəqiqələri qarşılıqlı hücumlar şəraitində keçib.

Yüksək temp ikinci hissədə də davam edib. Hər iki komanda sürətli hücumlar quraraq qol axtarışında olub. Lakin son zərbələr gah dəqiq alınmayıb, gah da qapıçılar komandalarını qoldan xilas ediblər. Qapıçımız Mateus Koxalski son saniyələrdə rəqibin penalti zərbəsini dəf edib. Nəticədə komandamız meydanı 1:0 hesablı qələbə ilə tərk edib.

Turnir cədvəlinə başçılıq edən "Qarabağ" bununla xallarının sayını 70-ə çatdırıb və ən yaxın izləyicisi olan "Zirə" ilə fərqi 15 xala yüksəldib.

Qeyd edək ki, "Qarabağ" ölkə çempionatında növbəti oyununu aprelin 11-də səfərdə "Səbail"ə qarşı keçirəcək.