Qarabağ FK
Misli Premyer Liqasının XVI turunun "Sabah" - "Qarabağ" oyunundan (1:1) sonra komandamızın baş məşqçisi Qurban Qurbanovun mətbuat konfransı keçirilib. Təcrübəli mütəxəssis görüş barədə fikirlərini açıqlayıb:
"Futbolçularıma təşəkkür edirəm. Xüsusən də, sona yaxın istədiyim dinamikada futbol oldu. Oyunu iki hissəyə bölərdim. Birinci hissədə və ikinci hissənin əvvəlində temp aşağı idi. Rəqib də ilk dəqiqələrdən fərqli heyətlə çıxış edirdi və fərqli oyun üslubu seçmişdi. Sanki bizim futbolçularımız da həmin tempə öyrəşdilər. Topun sürətini, dinamikanı artırmaq lazım idi. Ancaq ikinci hissədə getdikcə temp yüksəldi. Dəyişikliklərdən sonra azarkeşlər üçün daha maraqlı futbol oldu. Hər iki komanda qalib gələ bilərdi. Bəlkə də, ədalətli nəticə bərabərlik idi".
Baş məşqçi heyətdə tez-tez dəyişikliklər etmələrini sıx qrafikdə oynamaları ilə əlaqələndirib: "Ağır qrafikdəyik, üç gündən bir oyunlar keçiririk, səfərlərə çıxırıq. İlin sonu olduğundan, istər-istəməz futbolçularda yorğunluq hiss olunur. Heyətdə dəyişikliklər etməyimiz də oyunçuları mümkün zədələrdən qorumaq istəyidir. Avrokuboklarda temp fərqlidir. Həm də heç bir futbolçunun ritmdən düşməsini istəmirik".
