Qarabağ FK
UEFA Avropa Liqasının Liqa mərhələsinin IV turu çərçivəsində keçiriləcək "Bodo/Glimt" (Norveç) - "Qarabağ" matçından öncə komandamızın baş məşqçisi Qurban Qurbanov və kapitan Bədavi Hüseynovun mətbuat konfransı təşkil olunub. Təcrübəli mütəxəssis sabah baş tutacaq görüş barədə fikirlərini bildirib:
"Son vaxtlar qarşılaşdığımız rəqiblər arasında ən intizamlı komandaya qarşı oynayacağıq. Meydandakı bütün futbolçuları yerlidir. Norveç futbolunun son illər həm milli, həm də klub səviyyəsində nəticələri bu sahədə irəli getdiklərini göstərir. "Bodo/Glimt"in özünəməxsus oyun üslubu var. Bu rəqibi üstələmək üçün sabah bütün komponentlərdə diqqətli olmalıyıq. Həm meydança amili, həm nəticələri rəqibin üstün cəhətləridir. Buna baxmayaraq, futbolçularımızın uğurlu nəticə üçün əllərindən gələni edəcəklərinə inanıram".
Müdafiəçi Bədavi Hüseynov isə matça hazır olduqlarını söyləyib: "Sabah bizi çətin oyun gözləyir. "Bodo/Glimt" həm müdafiədə, həm də hücumda balanslı komandadır, kompakt futbol oynayır. Başa düşürük ki, xalımız yoxdur. Vəziyyəti dəyişmək istəyirik. Sabah yaxşı oyun sərgiləməyə və ilk xallarımızı qazanmağa çalışacağıq.
Qeyd edək ki, sabah Bodo şəhərində yerləşən "Aspmyra" stadionunda keçiriləcək qarşılaşma Bakı vaxtı ilə saat 21:45-də başlayacaq.
