“Bu cür komandalarla oynamaqdan çəkinməməliyik”

UEFA Avropa Liqasının Liqa mərhələsinin III turu çərçivəsində keçiriləcək "Qarabağ" - "Ayaks" (Niderland) matçından öncə komandamızın baş məşqçisi Qurban Qurbanov və monteneqrolu yarımmüdafiəçi Marko Yankoviçin mətbuat konfransı təşkil olunub. Təcrübəli mütəxəssis sabah baş tutacaq görüş barədə fikirlərini bildirib:

"Çox vacib oyun olacaq. Rəqib dünya futbolunda tanınır. Qarşılaşmaya pis hazırlaşmamışıq. Futbolçuların hazırlıq səviyyəsi pis deyil, istəklidirlər. Belə klubların Bakıya gəlməsi futbolumuza sevginin artması və inkişaf üçün böyük təkandır. Bizim də təcrübəmiz çoxdur, böyük klublara qarşı oynamışıq. Gələcəyə nikbin baxmaq və böyümək istəyiriksə, bu cür komandalarla oynamaqdan çəkinməməliyik. "Ayaks" yaxşı komandadır, dinamik, ağıllı futbol oynayır. Belə rəqiblərlə mübarizə apardıqca həm də bəzi məqamları öyrənirik. Bununla bərabər oyunumuzla azarkeşlərimiz razı salmağa çalışacağıq".

Marko Yankoviç isə qələbə qazanmaq üçün əllərindən gələni edəcəklərini söyləyib: "Motivasiyamız yüksəkdir. Hər birimiz yaxşı nəticə əldə etmək niyyətindəyik. Keçmişdəki matçlar göstərir ki, istənilən rəqibə qarşı yaxşı oyun sərgiləyəcək gücdəyik. Sabah qalib gələ və ya məğlub ola bilərik. Futbolun gözəlliyi ondadır ki, istənilən nəticə qeydə alına bilər. Ümid edirik ki, nəticə bizim üçün yaxşı olacaq"

Qeyd edək ki, sabah Tofiq Bəhramov adına Respublika Stadionunda keçiriləcək qarşılaşma saat 20:45-də başlayacaq.