Qarabağ FK
"Qarabağ" – FCSB (Rumıniya) - 2:3
Leandro Andrade, 1. Joyskim Dava, 41 (avtoqol) – Adrian Şut, 7, 73. David Mikulesku, 45+4
"Qarabağ" növbəti avrokubok oyununu keçirib. Avropa Liqasında mübarizə aparan Qurban Qurbanovun yetirmələri Liqa mərhələsində yeddinci matçına çıxıb. Komandamız Tofiq Bəhramov adına Respublika Stadionunda Rumıniyanın FCSB klubunu qəbul edib.
Komandamız oyunu aşağıdakı heyətlə keçirib: 97. Fabiyan Buntiç, 13. Bəhlul Mustafazadə (29. Marko Veşoviç, 70), 81. Kevin Medina, 2. Mateus Silva, 44. Elvin Cəfərquliyev, 6. Julio Romao (66. Patrik Andrade, 70), 8. Marko Yankoviç, 15. Leandro Andrade (11. Emmanuel Addai, 81), 21. Aleksey Kaşuk (27. Toral Bayramov, 81), 10. Abdullah Zubir (k), 90. Nəriman Axundzadə (22. Musa Qurbanlı, 81).
Matça əla başlanğıc edən futbolçularımız bir dəqiqə tamam olmamış hesabı açmağa müvəffəq olublar. Rəqibin müdafiəçisini aldadan Leandro Andrade qapıçı ilə təkbətək dueldən qalib ayrılıb. Komandamız aramsız hücumlarını davam etdirsə də, çox keçmədən qonaqlar bərabərliyi bərpa ediblər. Rumıniya təmsilçisi standart vəziyyətdən maksimum yararlanıb.
Buna baxmayaraq, həvəsdən düşməyən oyunçularımız rəqibin müdafiə xəttini gərginlikdə saxlamaqda davam ediblər. Hissənin sonlarına yaxın temp daha da artıb. Hücumların birində Elvin Cəfərquliyevin sol cinahdan ötürməsindən sonra top FCSB-nin müdafiəçisinə dəyərək tora daxil olub. Ancaq qonaq komanda fasiləyə bir neçə saniyə qalmış növbəti korneri məntiqi sonluqla yekunlaşdırıb.
İkinci hissə də komandamızın üstünlüyü şəraitində keçib. Lakin böyük qüvvə ilə müdafiə olunan qonaqlar çətinliklə də olsa, hücumların qarşısını alıblar. Bunun fonunda növbəti qol rumınlardan gəlib. FCSB futbolçuları üçüncü qolu da künc zərbəsindən ötürmədən sonra vurublar. Hesabda geri düşən komandamız son dəqiqələri bütünlüklə hücumda keçirib. Rəqib isə sıx müdafiə olunaraq, bərabərlik qoluna imkan verməyib. Nəticədə 5 qolun vurulduğu görüşdə FCSB 3:2 hesablı qələbə qazanıb.
Qeyd edək ki, "Qarabağ" Liqa mərhələsinin son turu çərçivəsində yanvarın 30-da Yunanıstanda yerli "Olimpiakos" klubu ilə qarşılaşacaq.
