Qarabağ FK
"Qarabağ" - "Şamaxı" - 3:2
Nəriman Axundzadə, 4. Aleksey Kaşuk, 29. Cəlal Hüseynov, 72 (avtoqol) – Belajdi Pusi, 14. Brahim Konate, 39
"Qarabağ" qış fasiləsindən sonra ilk oyununu keçirib. Komandamız Misli Premyer Liqasının XIX tur matçında "Şamaxı"nı qəbul edib. 2025-ci ilin ilk qarşılaşması Tofiq Bəhramov adına Respublika Stadionunda baş tutub.
Qurban Qurbanov bu görüşdə aşağıdakı start heyətinə şans verib: 1. Şahrudin Məhəmmədəliyev (k), 30. Abbas Hüseynov, 27. Toral Bayramov, 90. Nəriman Axundzadə, 81. Kevin Medina, 8. Marko Yankoviç, 2. Mateus Silva, 6. Julio Romao, 15. Leandro Andrade, 21. Aleksey Kaşuk, 11. Emmanuel Addai.
Matça sürətli başlayan futbolçularımız erkən qol vurmağa müvəffəq olublar. Artıq 4-cü dəqiqədə sürətli əks-hücumu Nəriman Axundzadə məntiqi sonluqla tamamlayıb. 10 dəqiqə sonra qonaqlar ilk təhlükəli hücum zamanı hesabı bərabərləşdiriblər. Təşəbbüsü yenidən ələ alan komandamızın ardıcıl hücumları 29-cu dəqiqədə öz bəhrəsini verib. Sol cinahdan ötürmədən sonra Aleksey Kaşukun başla zərbəsi qarşısıalınmaz olub. Lakin "Şamaxı" birinci hissənin sonlarına yaxın növbəti dəfə hesaba tarazlıq gətirib.
İkinci hissə qarşılıqlı hücumlarla başlayıb. Getdikcə oyuna nəzarəti ələ keçirən komandamız, nəhayət, 72-ci dəqiqədə qələbə qolunu vurub. Beləliklə, "Qarabağ" ev oyununda 3:2 hesabı ilə qalib gəlib. Turnir cədvəlinin zirvəsində qərarlaşan komandamız bu qələbədən sonra xallarının sayını 50-yə çatdırıb.
Qeyd edək ki, "Qarabağ" növbəti oyununu yanvarın 26-da evdə "Turan Tovuz"a qarşı keçirəcək.
