Qarabağ FK
"Sumqayıt" - "Qarabağ" – 0:2
Kadi Borqes, 31; Leandro Andrade, 38
"Qarabağ" növbəti oyununu keçirib. Komandamız Misli Premyer Liqasının XXV tur matçında "Sumqayıt"ın qonağı olub.
Baş məşqçimiz Qurban Qurbanov bu görüşdə aşağıdakı start heyətinə şans verib: 1. Şahrudin Məhəmmədəliyev, 55. Bədavi Hüseynov (k), 13. Bəhlul Mustafazadə, 44. Elvin Cəfərquliyev, 22. Musa Qurbanlı, 29. Marko Veşoviç, 10. Abdullah Zubir, 7. Yassin Benzia, 8. Marko Yankoviç, 9. Kadi Borqes, 15. Leandro Andrade.
Mehdi Hüseynzadə adına Sumqayıt şəhər stadionunda təşkil olunan oyunun ilk dəqiqələrindən futbolçularımız təşəbbüsü ələ alıb. Ardıcıl hücumlar quran komandamız 31-ci dəqiqədə hesabı açmağı bacarıb. Kadi Borqesin uzaq məsafədən möhtəşəm zərbəsi qarşısıalınmaz olub.
Komandamız cəmi 7 dəqiqə sonra meydan sahiblərinin qapısından ikinci qolu keçirib. Marko Yankoviçin ötürməsini bir toxunuşla dəqiq tamamlayan Leandro Andrade cari mövsüm 10-cu qolunu vurub və bombardirlər yarışında birinci pilləyə yüksəlib.
İkinci hissə də eyni ssenaridə keçib. Sona qədər matça nəzarət edən futbolçularımız bir neçə epizodda fərqi artırmaq şansını əldən veriblər. Digər tərəfdən müdafiədə səhvsiz çıxış edən komandamız meydanı 2:0 hesablı qələbə ilə tərk edib.
Çempionata liderlik edən komandamız bu qalibiyyət sayəsində xallarının sayını 60-a çatdırıb.
Qeyd edək ki, "Qarabağ" ölkə çempionatında növbəti oyununu martın 8-də səfərdə "Araz-Naxçıvan"a qarşı keçirəcək.
