Qarabağ FK
"Neftçi" - "Qarabağ" - 0:1
Marko Yankoviç, 89 (pen.)
"Qarabağ" növbəti oyununu keçirib. Komandamız Misli Premyer Liqasının XXIII tur matçında "Neftçi"nin qonağı olub.
Baş məşqçimiz Qurban Qurbanov bu görüşdə aşağıdakı start heyətinə şans verib: 99. Mateus Koxalski, 24. Aleksey İsayev, 13. Bəhlul Mustafazadə, 44. Elvin Cəfərquliyev, 90. Nəriman Axundzadə, 10. Abdullah Zubir (k), 81. Kevin Medina, 7. Yassin Benzia, 8. Marko Yankoviç, 2. Mateus Silva, 15. Leandro Andrade.
"Neftçi Arena"da təşkil olunan oyun yüksək tempdə start götürüb. Hər iki komanda sürətli hücumlarla qol axtarışında olub. Matçın 22-ci dəqiqəsində müdafiəçimiz Kevin Medina qırmızı vərəqə alıb. Komandamız meydançada 10 nəfərlə qalmasına baxmayaraq, rəqibə qarşı başabaş çıxış edib.
Gərgin mübarizə ikinci hissədə də davam edib. Komandaların ifasında sürətli və təhlükəli hücumlar qurulub. Futbolçularımız azlıqda oynamalarına baxmayaraq, bəzi komponentlərdə rəqibi üstələyiblər. Bu isə 89-cu dəqiqədə öz bəhrəsini verib. Kadi Borgesin qazandığı penaltini Marko Yankoviç qolla tamamlayıb. Bu qol sayəsində komandamız 1:0 hesablı səfər qələbəsi qazanıb.
Beləliklə, xallarının sayını 56-a çatdıran komandamız liderliyini bir qədər də möhkəmlədib.
Qeyd edək ki, "Qarabağ" ölkə çempionatında növbəti oyununu fevralın 22-də evdə "Sabah"a qarşı keçirəcək.
