Idman.biz
Taekvondoda böyük yarışların vaxtıdır. Bu günlərdə BƏƏ-nin Əl-Füceyrə şəhərində yeniyetmələr arasında dünya çempionatı başa çatıb və Azərbaycan komandası Saleh Heydərovun (57 kq) timsalında hesabına gümüş medal yazdırıb.
İdman.biz xəbər verir ki, birinci komanda üçün əsas yarış isə oktyabrın 24-30-da Çinin Usi şəhərində keçiriləcək dünya çempionatı olacaq.
Yeni Olimpiya tsikli bir çox suallara cavab verməlidir. Keçən il Olimpiya gümüşü qazanan Qaşım Maqomedov (58 kq) əslində taekvondomuzun nüfuzunu xilas edib. Təbii, bu il aparıcı idmançıların bütün diqqəti dünya çempionatına yönəlib ki, onlar bir daha özlərini sübut etməli və mükafatlar uğrunda mübarizə aparmalıdırlar.
Bu məsələ xüsusilə Azərbaycan taekvondoçuları üçün aktualdır, çünki son illərdə dünya çempionatlarında əldə olunan nəticələr ürəkaçan deyil. 2022-ci ildə Cavad Ağayev (68 kq) Qvadalaxarada bürünc mükafat qazansa da, növbəti il Bakıdakı yarış təmsilçilərimiz üçün medalsız keçdi. Bu mənada Usiyə qarşıdakı səfərə böyük ümidlər bəslənilir.
İlin əvvəlindən bəri komandamız Belçika və Niderlandda bir neçə turnirdə iştirak edərək müxtəlif dərəcəli medallar qazanıb. Məşqçilər heyəti də hazırkı hazırlıq vəziyyəti ilə tanış olub. Lakin məhz indi elə bir mərhələ başlayır ki, bir tərəfdən ilk yarışlar arxada qalıb, digər tərəfdən isə ən məsuliyyətli turnirlər qarşıdadır.
Bu baxımdan beynəlxalq taekvondo təqviminə diqqət yetirmək yerinə düşər. Buraya "Challenge" seriyasından olan və Qran Pri turnirlərinə seçim xarakteri daşıyan bir neçə yarış daxil edilib. Gərgin qrafik isə Dünya Taekvondosunun 2028-ci il Yay Olimpiya Oyunlarına lisenziya sistemində etdiyi bəzi dəyişikliklərlə əlaqədardır. Yeni sistem çoxpilləlidir və idmançılar Los-Ancelesə həm reytinq xalları, həm də seçmə turnirlər vasitəsilə vəsiqə qazana biləcəklər. Azərbaycan millisinin isə artıq indidən Olimpiya Oyunlarına lisenziya uğrunda mübarizəyə hazırlaşması zəruridir, çünki təsnifat mərhələsinin başlamasına çox az vaxt qalıb.
Reytinq xallarının iki mərhələyə bölünməsi müəyyən məntiqə əsaslanır. Birinci dövr 2023-cü ilin iyununda başlayıb və 2026-cı ilin yayında başa çatacaq. İkinci dövr isə növbəti iki ili, yəni Olimpiya marafonunun həlledici mərhələsini əhatə edəcək. Özü də ilk iki il ərzində toplanan xallar sonradan dəyişəcək – onların yalnız 50%-i qalacaq.
Taekvondoda reytinq Olimpiadaya vəsiqə üçün yeganə meyar olmasa da, dövr boyunca sabit çıxışlar idmançıya reytinq vasitəsilə Yay Oyunlarına düşmək imkanı verə bilər. 2028-ci ilin yanvarında hər çəki dərəcəsində ilk beşlikdə olan idmançılar birbaşa Olimpiya lisenziyası əldə edəcəklər.
Bəs bu xallar haradan toplanacaq? Bu baxımdan Qran Pri seriyası maraqlıdır, çünki bir neçə mərhələdən ibarət olacaq və burada yalnız "Challenge" turnirlərində seçimdən keçmiş idmançılar iştirak edə biləcəklər.
"Böyük Dəbilqə" çempionluq seriyasında isə Olimpiya lisenziyaları turnirin qaliblərinə veriləcək. Amma burada da müəyyən məqamlar var: əgər turnirin qalibi artıq reytinq üzrə lisenziya qazanıbsa, o zaman lisenziya "Böyük Dəbilqə"nin finalçısına qismət olacaq. Əgər finalçı da artıq vəsiqəni təmin edibsə, kvota reytinqdə növbəti olan idmançıya keçəcək. Məhz bu səbəbdən turnirin xüsusi əhəmiyyəti var – çünki təmsilçimiz Qaşım Maqomedov (58 kq) da Parisdə keçirilən son Olimpiya Oyunlarına vəsiqəni "Böyük Dəbilqə"də qazandığı gümüş medal sayəsində əldə etmişdi.
Fransa paytaxtında Azərbaycan taekvondosunu cəmi bir idmançı təmsil etmiş və medal qazanmışdı. Təbii ki, Los-Ancelesdə komandamız daha geniş heyətlə iştiraka ümid edir. Bunun üçün idmançılarımızın sabit çıxışlarını artırmaları və reytinqlərini yaxşılaşdırmaları vacibdir. Cari ilin əsas yarışı isə, şübhəsiz, oktyabr ayında Çinin Usi şəhərində keçiriləcək dünya çempionatı olacaq. Məhz həmin yarışda gələcək Olimpiya mübarizəsinə qatılacaq heyətin cizgiləri müəyyən oluna bilər. Beləliklə, bu mövsüm Yay Oyunlarına yeni təsnifatın başlanğıcı öncəsi ciddi bir sınağa çevriləcək. Hər şey yenidən başlayır.
Los-Ancelesə seçim sxeminə qayıdaraq onu da vurğulamaq lazımdır ki, 2028-ci ilin əvvəlində iştirakçıların əksəriyyəti artıq müəyyənləşəcək. Lakin əsas vəzifəsini yerinə yetirə bilməyənlər üçün hələ şans qalacaq – onlar qitə üzrə keçiriləcək təsnifat turnirlərində çıxış edə biləcəklər.
Zəki Feyzullayev
İdman.biz
