Report.az
Gəncə stadionunda baş tutan III MDB Oyunlarının açılışı möhtəşəm idman hadisəsi idi.
"Report" Gəncəyə ezam olunan əməkdaşı xəbər verir ki, bunu MDB-nin Baş katibinin müavini Nurlan Seytimov jurnalistlərə açıqlamasında deyib.
O, Gəncədə "Müstəqil Dövlətlər Birliyinin iştirakçısı olan dövlətlərin bədən tərbiyəsi və idman sahəsində əməkdaşlığı haqqında Saziş" iştirakçılarının Bədən Tərbiyəsi və İdman Şurasının iclası barədə danışıb:
"Bir sıra maraqlı müzakirələrimiz oldu. III MDB Oyunlarının açılış mərasimi ilə bağlı təkcə öz fikrimi deyil, həmin vaxt stadionda olan hər kəsin düşüncələrini bölüşmək istəyirəm. Dünən oyunlarının təntənəli açılışından həzz almaq imkanımız oldu. Bu, ilk növbədə, inanılmaz dərəcədə möhtəşəm bir hadisə idi. Qısa müddət ərzində ölkənin inkişafının əsas tarixi məqamlarını əhatə etmək, onları tamaşaçılara çox yüksək səviyyədə, rəngarəng və milli ruhda təqdim etmək təqdiredici idi".
N.Seytimov III MDB Oyunlarının önəmini qeyd edib:
"Yarışların ayrı-ayrı 7 şəhərdə keçirilməsi önəmli faktordur. 1600-dən çox idmançı 23 idman növü üzrə ədalətli mübarizə aparmaq, güclüləri müəyyənləşdirmək üçün buraya üz tutublar. İdman qurğuları çox müasir, funksionaldır. Düşünürəm ki, yeni tikilən və bərpa olunan idman obyektləri hələ uzun müddət Azərbaycanın idman ictimaiyyətinə xidmət edə biləcək. Bu, Azərbaycanın təşkil etdiyi MDB idman hərəkatına mühüm töhfədir".
III MDB Oyunları iclas saziş
