Idman.biz
Paralimpiya çempionu, üzgüçü Natali Pronina-Rəcəbli kütləvi idmanın inkişafına, sağlam həyat tərzinə təşviqə və istedadlı uşaqların aşkarlanmasına yönəlmiş layihələri həyata keçirməyə davam edir.
İdman.biz xəbər verir ki, o, "Həmrəy ol, Qalib ol" ictimai birliyinin təsisçisi və rəhbəridir.
Həyat yoldaşı Cəsur Rəcəbli və həmfikirlərdən ibarət komandası ilə birlikdə 1 İyun – Uşaqların Beynəlxalq Müdafiəsi Gününə həsr olunmuş tədbir hazırlayır.
Pronina-Rəcəbli saytımıza müsahibəsində tədbirlə bağlı danışıb: "Bu, sevinclə, estafetlərlə, hərəkətərlə və uşaqlıq ruhu ilə dolu fəal bir gün olacaq. Tədbir 10 nəfərdən ibarət iki komandanın iştirakı ilə oyun-estafet formatında keçiriləcək. Bu, sadəcə əyləncəli yarış deyil, uşaqların özlərini komandanın bir hissəsi kimi hiss edəcəkləri, dəstək səslərinin eşidiləcəyi, özünə inamın və güvənin yaranacağı bir yer olacaq. Bu il xüsusilə önəmlidir ki, tədbiri inklüziv formatda keçirəcəyik – estafetlər sağlamlıq imkanları məhdud olan uşaqlar üçün də uyğunlaşdırılıb. Bu, bütün uşaqlar üçün bərabər olmaq, güclü olmaq və birlikdə olmaq imkanıdır".
O, həmçinin qeyd edib ki, son iki il ərzində "Həmrəy ol, Qalib ol" birliyi kənd və qəsəbələrdə 26 səyyar tədbir təşkil edib: "Bu tədbirlərdə artıq 1000-dən çox uşaq iştirak edib. Onların arasında onlarla həqiqi istedad gördük. Bəziləri artıq idman bölmələrində məşqlərə başlayıb və inanılmaz irəliləyiş nümayiş etdirirlər."
Pronina-Rəcəbli dəstəyə ehtiyaclarının olduğunu da vurğulayıb: "Hazırda biz növbəti, çox vacib mərhələnin astanasındayıq – daha çox uşağı əhatə edən inklüziv sistemli proqramların yaradılması. Bunun üçün bizə həqiqətən dəstək lazımdır."
Paralimpiya çempionu sözlərinə belə davam edib: "Hazırda biz – gördüyü işə həqiqətən inanan çox az sayda insanıq. Bütün bu fəaliyyətləri təşkilat və ya şirkətlərin dəstəyi olmadan həyata keçiririk. Amma gizlətmirəm ki, 1 iyun tədbiri üçün hazırlıq zamanı bizə bəzi əsas şeylər çatışmır: texniki məsələlər və tədbirin sonunda komandaların mükafatlandırılması üçün xatirə hədiyyələri. Adətən heç kimdən kömək istəmirik, amma söhbət uşaqlardan gedirsə, hər kəsin anlayışına səmimi şəkildə ümid edirəm".
Nətali Pronina-Rəcəbli uşaq idmanının inkişafı ilə bağlı fikirlərini də bölüşüb: "Hər birimiz bir vaxtlar bu uşaqların yerində olmuşuq. Bəli, bu gün biz çempionuq, rekordçuyuq, qəhrəmanıq. Amma hər birimiz bir vaxtlar dəstəyə ehtiyac duymuşuq. Mən də. Ola bilər ki, uşaqlıqda kimsə məni dəstəkləsəydi, idman yolum daha asan və uzun olardı. Mən arzulayıram ki, Azərbaycanda hər bir uşağın idmanla məşğul olmaq imkanı olsun. Həmçinin onların dəstəyi olsun. Bu dəstək hər zaman dövlətdən olmasa da, qoy bizim kimi bu yolu keçənlərdən gəlsin. Axı bizim zəhmətimiz boşa getməyib, ölkə başçısı tərəfindən dəyərləndirilib. Mən Azərbaycan Prezidenti İlham Əliyevin xüsusilə idmanın dəstəklənməsi sahəsində apardığı siyasəti dərin hörmətlə qarşılayıram. Bunu öz karyeramda hiss etmişəm. Səmimi şəkildə inanıram ki, hər çempion, hər idmançı uşaq və kütləvi idmanın inkişafına töhfə verməyə borcludur. Biz buna biganə qala bilmərik. Axı bu bizim gələcək nəslimizdir. Güclü bir ölkənin gələcəyi məhz onlardan asılıdır!"
Zəki Feyzullayev
İdman.biz
