Idman.biz
Milli Olimpiya Komitəsində (MOK) 23 İyun – Beynəlxalq Olimpiya Günü münasibətilə tədbir keçirilib.
İdman.biz AZƏRTAC-a istinadən xəbər verir ki, əvvəlcə MOK-un illər ərzində gördüyü işlərdən bəhs edən videoçarx nümayiş olunub.
Komitənin vitse-prezidenti Çingiz Hüseynzadə Beynəlxalq Olimpiya Gününün 1948-ci ildən etibarən hər il qeyd olunduğunu diqqətə çatdırıb. O, bu bayramla əlaqədar ölkəmizdə müxtəlif tədbirlərin keçirildiyini bildirib. MOK rəsmisi Azərbaycan gənclərinin idmana böyük maraq bəslədiyini və bunun davamlı olacağına inandığını söyləyib.
Elm və təhsil nazirinin müavini Firudin Qurbanov isə tədbirin məktəblilərin inkişafında mühüm əhəmiyyət kəsb etdiyini deyib. O, Azərbaycanın dünyanın idman mərkəzi hesab edildiyini qeyd edib. F.Qurbanov şagirdlər arasında idmanın təbliğatı üçün layihələr həyata keçirdiklərini və gələcəkdə də bununla bağlı planların olduğunu vurğulayıb. Nazirlik rəsmisi MOK-un təşəbbüsü ilə start verilən və ölkədə geniş vüsət alan Olimpiya Mədəniyyəti və Təhsili Proqramı (OCEP) layihəsi çərçivəsində tədbirlərin uğurla gerçəkləşdiyini söyləyib.
Həmçinin tədbirdə bildirilib ki, Azərbaycan müstəqil dövlət olaraq Olimpiya hərəkatına 1992-ci ildən qoşulub. Dövlətimizin başçısı İlham Əliyev 1997-ci ildə Milli Olimpiya Komitəsinin Prezidenti seçildikdən sonra Azərbaycan Olimpiya Hərəkatında sürətli inkişaf başlayıb. İdmançılarımız 30 il ərzində 8 Yay və 6 Qış Olimpiya Oyunlarında iştirak edib, ümumilikdə 9 qızıl, 16 gümüş və 31 bürünc medal qazanıb.
Sonra Olimpiya Dəyərlərinin Tədrisi Proqramı (OVEP) üzrə təşkil edilmiş təlimlərin yekunu barədə məlumat verilib. Azərbaycanda OVEP-in 2024-cü ildən etibarən silsilə və sistemi şəkildə tətbiq olunmağa başlandığı, statistik təhlillərə əsasən, təlimə qatılan müəllimlər arasında ən çox iştirakçının Binəqədi, Sabunçu, Xətai və Suraxanı rayonlarında qeydə alındığı diqqətə çatdırılıb.
Rəsmi çıxışlardan sonra OVEP və OCEP üzrə fəal iştirak etmiş şəxslərin təltifetmə mərasimi təşkil olunub. Onlara diplom və dəyərli hədiyyələr təqdim edilib.
İdman.biz
