Los-Anceles üçün RƏQƏMLƏR

Olimpiadanın medal sıralaması komandaların nəticələrinin hesabıdır.

İdman.biz xəbər verir ki, Azərbaycan millisi ümumi hesabda "Top-30"a daxil olmaqla tarixinin ən yaxşı nəticəsinə imza atıb.

Paris göstəricilərindən istifadə edərək, Los-Anceles-2028 üçün müəyyən statistik hesablamalar aparıla bilər. İki qızıl, iki gümüş və üç bürünc medalla komandamız, məsələn, doqquz mükafata malik Kubanı qabaqlayaraq ilk "30-luğ"a daxil olub. Bərabər sayda qızıl və daha çox bürünc medala (6) malik kubalılar gümüş sayına (1) görə bizdən geridə qaldılar.

Bununla belə, Paris-2024-ün sıralamasında cəmi 7 medalla "Top-14"ə daxil olan ölkə var. Bu, dörd qızıl və üç bürünc medala malik İrlandiyadır.

Yəni medalların əyarı həmişə birinci yerdədir. Bolqarıstanı da qeyd edə bilərik. Onlar eyni sayda 7 medalla (3-1-3) "Top 26"da yerdə qərarlaşıb.

Ən azı üç qızıl medalı o qədər də çox ölkə qazana bilməyib. Braziliya, İran, Ukrayna, Rumıniya, Gürcüstan, Belçika, Serbiya və Çexiya da bu sahədə fərqləniblər. Təbii ki, cüdoçuların uğurlu çıxışından sonra güləşçilərin mübarizəyə başlamasını, Alfonso Dominqesin finala qədər irəliləməsini, Qaşım Maqomedovun finala gedən yolunu nəzərə alaraq, komandanın ən azı daha bir qızıl mükafat alacağına ümid etmək olardı.

Ancaq ən yüksək əyarlı metalın miqdarını artırmaq mümkün olmadı. Təbii ki, hər bir mükafat dəyərlidir.

Bütün bunlar növbəti Olimpiadada uğurlu çıxışla komanda hesabında hansı nəticənin mümkün ola biləcəyini anlamaq üçün lazımdır. Məsələn, üç qızıl "Top 25"ə və ya hətta daha yüksəklərə qalxmağa kömək edə bilər. Bu, daha çox digər komandaların nəticələrindən də asılıdır.

Əgər cüdonun Paris zirvəsini qoruya, güləşin də maksimumunu göstərə biləcəyini ehtimal etsək, onda dörd ildən sonra qızıl sayında yeni rekord əldə olunması mümkündür. Xüsusən də indi, Parisdən sonra, Azərbaycan idman tarixinə yeni səhifə yazmaq üçün nə etmək lazım olduğu göz qabağındadır.

Artıq Hidayət Heydərov və Zelim Kotsoyev ABŞ-a titullarını qorumaq üçün gedəcəklərini bəyan ediblər. Bu da daha bir mühüm məqamdır. Tariximizdə hələ ikiqat olimpiya çempionu yoxdur. Bəlkə də bu ilk nəhayət Los-Ancelesdə gerçəkləşəcək.

Zəki Feyzullayev
İdman.biz