Sport24.az
CEYHUN ƏLİYEV
Qələbə barədə yazmaq necə də xoşdu. Axı, qələmə aldığın hər sətirdən, hər sözdən, hər hərfdən qürur təravəti gəlir. Ötən axşam bütün Azərbaycanın, ölkə xaricində yaşayan azərbaycanlıların gözləri mavi ekrana dikilmişdi. Günboyu bizi həyəcanlanmağa sövq edən Hidayət Heydərov dişi-dırnağı ilə Paris Olimpiadasının finalınadək irəliləmişdi.
Haşiyə 1. Mirzə Fətəli Axundovun "Hekayəti Müsyö Jordan həkimi-nəbatat və dərviş Məstəli şah cadükuni məşhur" komediya janrında yazılmış əsəri ilə bəlkə də istədiyimiz sayda oxucu tanış deyil. Ancaq "Dərviş Parisi partladır" filminin ən azı fraqmentlərini yəqin ki, hər kəs görüb.
Mübarizəyə 1/8 finaldan başlayan həmyerlimizin 73 kq-da reytinq-favorit olması işini bir az da çətinləşdirirdi. Axı, bütün rəqiblər əsas namizədə qarşı ikiqat əzmlə mübarizə aparırdı.
...Hər qarşılaşması ayrı bir tarix, ayrı bir zəfər oldu. Ancaq yarımfinalda Akil Qyakova ilə görüşün "qızıl xal" uğrunda mübarizədə yaşanan an tam fərqli bir hiss idi. Rəqibinin fəndindən son anda fantastik "sığortalanma" ilə çıxmasını görmək bu dramatik yürüşün kulminasiya anı idi... əlbəttə ki, finaladək yaşadığımız anların. Qarşıda isə Hidayəti həlledici qarşılaşma gözləyirdi.
Haşiyə 2. Hadisələr 1848-ci ilə təsadüf edir. Qarabağa (!!!) gələn fransız botanik Müsyö Jordan Hətəmxan ağanın qonağı olur və qədim torpağımızın yerli bitkiləri barədə informasiya toplayır. Fransaya qayıtmaq ərəfəsində Jodan Hətəmxan ağanın qardaşoğlusu Şahbaz bəyi özü ilə Parisə aparmaq və orada elmə yitələndirmək istədiyini bildirir. Lakin evdəki xanımlar İrandan dərviş gətirir və onun sehrləri ilə Parisi partladırlar.
Juan Benjamin Qabanın çempionluğa əsas namizədlərdən sayılan yaponiyalı Soiti Xasimoto kimi rəqibini sıradan çıxarması çox şeydən xəbər verirdi. Nəzərə alsaq ki, hadisələr ağlaşma, şər-böhtan atma, üzədurma, mənimsəmə üzrə dünya rekordçusu olan ermənilərin ən böyük qardaşı Fransanın paytaxtında cərəyan edirdi və Qaba da məhz "Xoruzlar diyarı"nın təmsilçisi idi, 27 yaşlı pəhləvanımızın işinin nə qədər mürəkkəb olacağı aydın olurdu.
Haşiyə 3. Əsl həqiqətdə isə 1848-ci ildə Parisdə inqilab baş verir və hadisə barədə məlumatlandırılan Jordan tələsik Azərbaycanı tərk edir.
Bu dəfə Parisi 27 yaşlı sadə göyçaylı balası "partlatdı". Nə dərvişə ehtiyac qaldı, nə də Müsyö Jordana. Ölkəmizə qarşı ifrat dərəcədə murdar siyasət yürüdən Fransanın paytaxtında qüdrətli himnimizin səslənməsi, dünyanın ən gözəl bayrağının dalğalandırılması isə Mirzə Fətəlinin yaratdığı sənət əsərinin 175 ildən sonra əyani nümayişi oldu - Hidayət Parisi "partlatdı"! Başqa cür də demək olar: "xoruzlar diyarı"nda "xoruzlarını verdi qoltuqlarına".
