Sport24.az
Paris-2024 Yay Olimpiya Oyunları davam edir. Sport24.az xəbər verir ki, bu gün güləş yarışlarının son iştirakçıları mübarizəyə qoşulublar. Azərbaycan millisinin iki sərbəst güləşçisi ilk qarşılaşmalarına çıxıb.
65 kqda yer alan Hacı Əliyev yarışa 1/8 finaldan başlayıb. Olimpiadaların gümüş və bürünc mükafatçısının ilk rəqibi Meksika təmsilçisi Ostin Qomes olub. Görüş 7:0 təmsilçimizin xeyrinə bitib.
97 kqda qüvvəsini sınayan Maqomedxan Maqomedov da 1/4 finala vəsiqə üçün mübarizə aparıb. Dominikan Respublikası idmançısı Luis Migel Pereslə üz-üzə gələn güləşçimiz rəqibinə heç bir şans verməyib və 9:0 hesabı ilə qələbə qazanıb. Maqomedov ikinci qarşılaşmasında Zbiqnev Baranovski (Polşa) ilə qüvvəsini sınayacaq.
Qeyd edək ki, sərbəst güləş millimiz Paris-2024-ə altı güləşçi ilə yollanıb. Əliabbas Rzazadə (57 kq), Turan Bayramov (74 kq) və Osman Nurmaqomedov (86 kq) yarışı medalsız başa vurub, Giorgi Meşvildişvili (125 kq) 3-cü yer uğrunda görüşə çıxacaq.
