Azərbaycanlı ilk təhlükəsiz idman sertifikatlı məşqçi: "Layihə gəncləri və uşaqları müdafiə etməyi hədəfləyir."

Məşqçiliyin Təkmilləşdirilməsi üzrə Beynəlxalq Sertifikasiya Proqramı (ICECP) çərçivəsində təhlükəsiz idman (Safe Sport) üzrə sertifikat əldə edən ilk azərbaycanlı məşqçi Ayan Xankişiyeva uğuru haqqında təəssüratlarını bölüşüb.

Məşqçi "Report"a açıqlamasında sözügedən proqramda iştirakını qiymətləndirib.

O, layihənin məqsədi barədə danışıb:

"Milli Olimpiya Komitəsinin dəstəyi ilə məşqçiliyin təkmilləşdirilməsi proqramında iştirak etmişəm və uğurla başa vurmuşam. Proqramda iştirak üçün seçilməyim böyük şərəf oldu. Ötən ilin aprelindən başlayan proqram bir il davam etdi. Bu müddət ərzində məşqçilik, idarəetmə metodları, psixoloji hazırlıqla bağlı bir çox dərslər keçdik. Layihə kimi təhlükəsiz idmanı (Safe Sport) seçmişdim. Həm nəzəri, həm də praktiki biliklər qazandım. Proqram yalnız öyrənməklə bitmədi. Həm də düşünməyə və bildiklərimizi öz ölkəmizdə tətbiq etməyə yönəldirdilər. 6 aylıq layihənin bütün əsas hissələrini Azərbaycanda keçirdim. Araşdırmalardan sonra məlumatları topladıq və bu mövzuda real ehtiyacları müəyyənləşdirdik. Layihənin məqsədi idman mühitində xüsusilə gəncləri və uşaqları qorumaqdır. Hazırda bu layihəni İdman Akademiyasının daxilində genişləndirməyi və davamlı şəkildə tətbiq etməyi planlaşdırıram".

Mütəxəssis ABŞ-də beynəlxalq səviyyədə fəaliyyət göstərən təşkilatın iş prinsipləri ilə də tanış olub:

"ABŞ-də "USA Cycling" təşkilatında təcrübə keçmək imkanım oldu. Bu, mənə beynəlxalq səviyyədə fəaliyyət göstərən bir təşkilatın iş prinsiplərini öyrənməyə şərait yaratdı. Bundan əvvəl Avropada çalışmışdım. ABŞ və Avropada velosiped idmanı üzrə sistem tam başqadır. Hər iki sistemi təhlil etmək çox maraqlı idi. Nəhayət, ötən həftə Lozanna şəhərində Beynəlxalq Olimpiya Komitəsinin (BOK) rəsmi məzuniyyət mərasimi keçirildi. Diplomumu BOK-un prezidenti Tomas Baxdan almaq mənim üçün qürurverici idi və unudulmaz bir an oldu. Bu günə qədər bir neçə belə proqramda iştirak etmişəm. Amma ICECP tam fərqli təcrübə oldu. Bu proqram bilik, praktiki bacarıq, həm də beynəlxalq əməkdaşlıq baxımından mənə yeni baxış bucağı qazandırdı. Bu təcrübə mənim üçün məşqçi kimi böyük addım və idmana fayda vermək yönündə möhkəm baza oldu".